[احمد سويلم]

ازاى تحافظ على عربيتك

مبدئيا اعرف كده ان عربيتك اجره يعنى معرضه فى اى وقت تاخدلها خبطه او بوسه او حكه خفيفه كده على الماشى
اهم حاجه توكل على الله وربنا هو اللى بيسترها لان احنا بنغلط كتير جدا وربنا وحده هو اللى بيعديها
ونصيحه منى لازم تعين للعربيه متوسط 10-15 جنيه يوميا يعنى من 300-450 جنيه شهريا يكونوا على جمب خارج مصاريف العربيه
وده ياسيدى عشان لو لقدر الله حصل اى حاجه فى العربيه فى وقت انت مديون او ممعكش تدفع فلازم يكون معاك رصيد باستمرار وتكون جاهز

متركبش العربيه لسواق ابدا ابدا مع احترامى لكل السواقين المحترمين لان العربيه خيرها للى راكبها مش لصاحبها وممكن ربنا يوقعك فى واحد بن حلال يخبطلك عيل او يعمل حاجه غلط فى العربيه وفى الوقت ده انت اللى هاتتشد لغايه ماتثبت ان الوقت ده انت مكنتش سايق
ولو اضطريت اوى تركب لسواق بعد ماتزهق وتتعب بعد سنه لازم تمضيه وتبصمه على وصل امانه عشان يحس ان العربيه بتاعته ويخاف عليها زيك بالظبط
لو معملتش كده الله لايقدر العربيه فى مره هاتتخبط هاييجى يرمهالك عند البيت ويسيبك ويمشى

ثانيا : ابعد نهائيا عن الشراشير لانك هتقابلهم كتير جدا واقدر اقولك نص الشغل بالليل بيكون مع النماذج ديه
ثالثا : الشغرنه مؤرفه الى ابعد حد تتخيله وعشان كده بقولك متحاولش ان حد يستفزك وخلى اعصابك بارده ومتضايقش نفسك خالص لانك لو مزاجك اتعكر هاتلف على العربيه وهاتروح على البيت ومش هاتشتغل وانا انصحك بكده لو حسيت انك اتضايقت لاتتردد وروح على بيتك على طول احسن متعمل جريمه او تخبط عيل او تفترى على العربيه فى السواقه وانت اكيبد عارف سواقه النرفذه عامله ازى
وانت اصلا ياما هاتشوف فى شوراعنا الجميله فلازم تكون اعصابك هاديه

رابعا : متشتغلش فترات طويله لانك اليوم اللى هاتشتغل فيه كتير غصبن عنك هتلاقى نفسك نايم اليوم اللى بعديه فعشان كده بقولك حاول تقسم وقتك وخليك فى متوسط 6 -8 ساعات يوميا فقط ودول اعتقد فى بلد زى المنصوره ممكن يعملوا معاك 100 جنيه او اكتر كمان لان انتوا بتركبوا واحد واتنين وتلاته عكس هنا فى اسماعيليه بنركب واحد فقط بياخد التاكسى كله وممنوع ان اقف لحد تانى فى الطريق
ملحوظه (( اسماعيليه البلد الوحيده اللى فيها الموضوع ده لان بيقولوا عليها سياحيه ))

خامسا : مش هوصيك طبعا على الزيت والفلاتر والتشييك باستمرار على العربيه لانها هاتبقى ان شاء الله ايدك ورجلك ومتحاولش تسترخص فى اى حاجه وجيبلها افضل حاجه واسال فى كل حاجه انت مش عارفها سواء هنا فى المنتدى او مع الصنايعيه اللى هخايركبوا معاك كتير عشان تقدر تاخد قرار بالعيب اللى موجود عندك او القطعه اللى انت عاوز تشتريها
وانت لما هاتحول غاز حاول تشتغل ساعه يوميا بنزين عشان الغاز فعلا بياذى المكنه على المدى البعيد والبنزين زى ما انت عارف بيعمل طبقه تشميع او كاربون او تزييت على البساتم والسبايك وكده
بالنسبه للريدياتير حد ميه خضراء موبيل الجركن عامل 74 وهايعد معاك سنه او سنه ونص كمان حسب استهلاكك لان الفيرنا اصلا مبتسحبش مياه كتير والعربيه اصلا زيرو ربنا يباركلك فيها
انا عن نفسى لسه شارى 3 جركن من شهر والعربيه بقالها معايا 3 سنين

سادسا واهم حاجه اى حد غلبان لقيته فى طريقك وممعهوش فلوس ركبه على طول حتى لو شكيت انه بيشتغلك
صدقنى كده هتلاقى ربنا بيسترها معاك فى حاجات كتير والعربيه هيبقى فيها لله

معلشى الكلام مش مترتب
بس لو احتاجت اى استفاسر تانى فى كيفيه الشغل او اى حاجه تانيه انا تحت امرك ياكبير
وقولى بقى
انت عملت ايه فى المكتبه ؟؟؟؟؟