المشاركة الأصلية كتبت بواسطة noor a.s
مساء الخير ياجماعة .. اختكم فيرناوية جديدة وجبت الفيرنا بعد طول بحث فى المنتديات وسمعت عن عيوبها اللى انتم كاتبينها بمنتهى الامانة بجد ربنا يكرمكم , ومعايا فيرنا مانيوال كاملة 2012 المهم ده اول عربية ليا بالاضافة إنى الحمد لله مبفهمش فى العربيات وبجد مش قادرة الاحظ العيوب ده وحاسة انها ممكن تكون عندى بس لعدم خبرتى مش شايفاها , ثانيا انا لسة سواقة جديدة يعنى اكيد ممكن اعمل حاجات غلط عالعربية ومعنديش اللى يوجهنى فياريت بقى نصايح احافظ بيها عالعربية وكنت عاوزة اعرف هى العربية الجديدة محتاجة تسخين قبل ما اطلع بيها ولا لا؟؟؟ وحاجات كتير من الاخر انا هزهقكم بس استحملونى بقى (((: وبجد انا معجبة جدا بصدق ردودكم والمحايدة فى الكلام عن العربية .
|
مبروك يا فرناوية هانم وربنا يديكى خيرها ويكفيكى شرها بصى العربية عموما ما بتحتاجش تسخين ولا حاجة بس روح العربية الزيت والمياه يعنى الزيت يتغير فى مواعيده وبالنسبة لك علشان انتى ست فوضى امرك لله وتابعى الصيانة الدورية مع غبور واشترى دماغك والعربية ممتازة واعطالها مش كتيرة بس لو ايديك فيها باستمرار ومتهملهاش
وبعدين انتى دلوقتى فى فترة التليين يعنى يستحب اول 5000 ك متزوديش السرعة عن 90 ومتحرقيش غيارات يعنى متخليش صوت الموتور يبقى عالى و RBM ما يعديش 3 علشان تحافظى على طول عمر الموتور وعلى مهلك وواحدة واحدة وربنا يسترها معاكى ومعانا ... وفى اى وقت لو عندك اى استفسار انا وزملائ الاعضاء موجودين ... ولكى تحياتى
