[مهند سالم]

طبعا أنا عانيت من مشكلة في الموتور بتاع عربيتي (مازادا 323 مو 82) وهي إن الموتور كان فيه صوت، للأسف أنا شخصت الصوت غلط، لأني كان عندي صوت في كرنك الموتور بالإضافة لبلية فاسدة تقريبا العجلة إلا قدام يمين، فده كان بيعمل معايا صوت وجوجة كان أعتقد إنه خارج من الموتور. لكن الحقيقة إن الموتور كان فيه خبطة في الكرنك فقط. وصوت الوجوجة كان في البلية.
طبعا بعد ما فكينا لاقينا الموتور عايز عمرة كاملة، كان قراري سريع: هأشتري موتور استيراد طبعا، مين هيوقف عربيته أسبوع ويفضل رايح جي بين الميكانيكي والخراط وبتوع قطع الغيار لحد لما نفسه يتقطع ويكره الحياة، وياريت بفائدة، لكن للأسف أخطاء الميكانيكية بقت فعلا كثير جدا ومفيش ضمير، وبالتالي ممكن بعد ما تصرف 2000 جنيه غير الوقت والجهد والتليين تلاقي سعادة الباشا الميكانيكي غلط في أي حاجة وهو بيقفل، ويبوظ العمرة. وبالتالي القرار الصحيح والسريع: موتور استيراد طبعا، يتركب في ليلة وتمشي بالعربية في ساعتها من غير تليين ويبقى عندك موتور استبن بكل كمالياته.
مواصفات الموتور عشان ما حدش يتنصب عليه:
أولا الموتور ب1500 جنيه، بالإضافة ل100 جنيه مصاريف تسجيل في المرور.
- الموتور بالفتيس
- الموتور بكل الكماليات من دينامو ومارش وكرابيراتير (وجبته بكاربيراتير كهربا)، واسبيراتير (اسبيراتير الكتروني)، حتى طقم الكهربا لازم يكون موجود، كل شيء تقريبا.
- الموتور لازم حضرتك تجربه قبل الشراء ويكون معاك فني متخصص.
- لازم تطمئن إن الموتور لم يفتح.
- تكلفة الفني بالتركيب 200 جنيه فقط لا غير.
التكلفة الإجمالية 1800.