[حازم شاهين]

إللى بيحصل ده طبيعى فى فترة إنتقالية زى إللى إحنا فيها دى
و كمان الطبيعى إن الناس تبقى ليها وجهات نظر مختلفة مش معقول كلنا نبقى فى إتجاه واحد

طالما بننادى بالحرية و الديموقراطية يبقى طبيعى نسمح لكل الناس إنها تعبر عن رأيها و وجهات نظرها بحرية

واحد يعجبه الحكومة و احد يأيدها
واحد يحب شخص و واحد يختلف معاه
و هكذا

و المطالبات الفئوية إللى منتشرة حاليا سببها السنين الطويلة من الحرمان من التعبير عن الرأى و الحرمان من القدرة على التغيير صحيح شكلها فوضوى و مضر لكن بمرور الوقت هتقل الفورة دى و اﻹحتجاجات و يبتدى الناس تانى تفكر فى المصلحة العامة قبل المصلحة الشخصية الضيقة و خصوصا لما يبتدى الناس العادية حس إن النظام إتغير فعلا و إن فيه أمل فى اﻹستماع ليهم و لمشاكلهم و إن فيه خطوات فعلا بتتم على أرض الواقع

كل ما تتاخد خطوة فى اﻹتجاه الصحيح كل ما الناس تتطمن أكتر و تقل إحتجاجتهم و مطالباتهم الفردية

لكن فى الفترة اﻹنتقالية لسه مفيش نظام محدد للتعبير عن اﻹختلاف فى وجهات النظر بطريقة منظمة

و ده إللى المجتمع بيحاول يعمله دلوقتى
المجتمع ممثل فى رموزة و أصحاب الفكر و الثقل و التأثير بيحاولوا يوضعوا نظام جديد للدولة يكون مكفول فيه السماح بحرية التعبير عن الرأى و يكفل القدرة على الفعل و التغيير بطريقة منظمة و سلمية

و وضع النظام ده فى حد ذاته بياخد فترة
و اللى بياخد فترة أكبر هو تغيير سلوك و قناعات أفراد المجتمع
لغاية ما يبقى أغلب أفراد المجتمع مقتنعين بسيادة القانون

و إن اﻹلتزام بالقانون ناتج عن إحترام القانون مش ناتج عن الخوف من الشرطة أو العقاب

لكن فى النهاية الدولة المصرية دولة قوية و صلبة و إحتمال تفككها إحتمال صعب
و الفوضى الدائمة غير مسموح بيها فى دولة محورية زى مصر
غير مسموح بيه من شعبها قبل ما يكون غير مسموح بيه دوليا

إستقرار و أمن مصر معناه إستقرار و أمن منطقة الشرق اﻷوسط و العالم كله

و قيمة مصر و أهميتها دى مش طنطنه فارغة لكن ده حقيقة تاريخية و جغرافية و دولة بحجم مصر و أهميتها لا يمكن أن تظل فى حالة عدم إستقرار لمدة طويلة
و المجلس اﻷعلى فاهم كده كويس
و الشعب أغلبه فاهم كده كويس
و باقى دول العالم فاهمين كده كويس جدا

مصر رايحة للأحسن إن شاء الله