المشاركة الأصلية كتبت بواسطة khaabas
|
ههههههههه مفيش فايده, كمان عشر سنين كده تطلع عربية جديدة إسمها "حلبسة " مثلا وواحد يدخل يسأل "هي حلبسة دي عربية حلوه", نقوم نرد عليه إحنا ونقول له "لوجان أحسن وبرقبتها" ههههه ماهي العاده تحكم.
مساء الفل يابرنس, أنا بنكشك بس, مجرد دعابة يعني
إلى صاحب الموضوع, زي ما العضو akerima قاللك, أنا لسه لوجاناوي مبقاليش شهر, فمش حعرف أفيدك بخبرتي الشخصية, لكن أنا بحثت قبلك كتييييييييييييير قبل ما أشتري, ورد العضو akerima كان هو رد كل واحد إقتنى العربية وجربها لفترة لا تقل عن السنه, وكمان رأيهم فى الوكيل إنه من أحسن التوكيلات في مصر وده تقريبا بإجماع الآراء مع العلم أنا لسه مجربتوش, وطبعا المشاكل الفردية أو التجارب السلبية ميخلاش منها أي توكيل وأي عربية, المهم العموم.
أما غير كده من آراء فمع إحترامي الكامل لأصحابها وتقديري ليهم, كلها آراء نابعة عن السمع وعدم التجربة أو الإنحياز لركوبتة الشخصية. أو عن تجربة سيئه (إن عربية يطلع فيها عيب مثلا) وده وارد وبنسبة طبيعية جدا زي أي عربية. المهم تكون قريت كويس وعرفت عيوبها وميزاتها عشان تشتري وإنت مقتنع تماما, أنا لما إشتريت كنت عارف العيوب قبل المميزات ومحضر نفسي للتأقلم معاها (زي مكان الكلاكس وأزرار الزجاج مثلا, وهي مش كارثة يعني) أو إنها لو ظهرت متخضش وأبقى عارف إن فى التوكيل حيظبطوها فى أول زيارة ليهم (زي سخونة الدواسات مثلا).
بس كده, وفى الأول والآخر إستخير ربنا وإن شاء الرحمن حيسهللك إللى فيه الخير, وهي عموما عربية جميلة وزي الفل معايا الأوتو منها وتحس فعلا إن فلوسك في المكان الصحيح وإن شاء الله تبقى أصيله معايا لحد مربنا يكرم, وآسف للإطالة بس حبيت أنقلك تجربتي لما كنت فى نفس موقفك من حوالى شهر ونصف.
بالتوفيق ونباركلك قريب إن شاء الله.