فيات 128 ........ بصوا بقي علشان انا تعبت
سلام عليكم
انا كنت ناوي اشتري عربية غالية لكن للاسف تراجعت عن قراري و هاشتري 128 علشان الفلوس اللي كنت هاجيب بيها العربية الغالية دي هيا كل اللي حيلتي و صعبان عليا اني اجيب بيها كلها عربية , انا علي وش جواز
فا قررت اجيب عربية في حدود 20 الف بس
انا صليت استخارة و حاسس اني عاوز اجيب 128 , بالرغم من ان مافيش حد ماقاليش اوعي تجيبها دي عربية هاتقرفك , لكن كلام الناس كله يدل علي ان اللي بيجيب العربية دي بيعاملها معاملة سيئة فا بالتالي بتكفره في عيشته.
النهاردة شفت عربية 128 مو87 ب 15 الف , الشاسيه مافيهوش حاجة , و قررت اعمل الاتي
هاجيبها , و اول ما اخدها هارفع العربية , هاركب شدادات(بارات) للشاسية , او هاعمل حوار صب الالومنيوم ده و لو عرفت اعمل الاتنين هاعمل .
هاغير المساعدين بمساعدين كورسا لانها احسن حاجة لل 128 علي ما سمعت , و هاجيب سوست رياضي, لو عرفت اجيب مساعدين و سوست رياضي ممكن برده(انا ماليش في حوار تهبيط العربية ده ماباهتمش بيه قوي)
طبعا انا هاغير كل السيور و الفلاتر و البوجيهات و اي حاجة بتتغير و اجيب منها النظيف من اولها كده.
احتمال اغير اللي جوا الصالون كله بس واخدة واحدة , هاجيب الاول كراسي طيارة علشان كراسي العربية مبقلظة و ماباعرفش اقعد مرتاح فيها لاني طويل شوية
هاجيب تابلوه كورسا كمان شوية.
العربية مش محتاجة حاجة من بره و شكلها مش وحش.
سؤال بقي
هل اللي انا عملته ده يخلي العربية دي تمشي مشاوير صغيرة في المدينة (حلوان -مايو يوميا للي يعرف المسافة) و ماتتعبش مني.
طب لو حبيت اسافر بيها مرة واحد في السنة لمطروح - انا عارف انها مغامرة - لو انا عامل فيها كل اللي انا عامله ده , تتعب مني برده ولا لا.
انا عارف ان فيه ناس هاتقول ماتصرفش عليها علشان ما تستاهلش , انا هاصرف عليها علشاني انا مش علشان العربية.
و اخيرا لو المهمة دي هاتنجح هاتتكلف كام
انا اسف طولت عليكم.
|