رد: أية مشاكل الباسات ؟!! (التوكيل -قطع الغيار-الفتيس-.....) ؟!!!
شوف الباسات الجديدة ممتازة جدا لكن فى مشكلة موجودة فى مصر بس و هى ان المحرك صغير جدا جدا بالنسبة لحجمها و وزنها عشان كدة هما زودوها بالتربو عشان يقدر يشدها شوية و دى بيسبب تقليل العمر الافتراضى للمحرك بشكل كبير عشان كدة انصحك تجيب باسات من ٩٨ الى ٢٠٠٦ و افضل موديل فيهم هو اللى بين ٢٠٠٠ و ٢٠٠٢ دة موديل اسمة باسات FL و حتى لو جبتها ١٦٠٠ CC مفيش اى مشكلة
اما عيوب الفولكس فاجن عموما و الاوكتافيا و السيات التابع لفولكس كالاتى ... رومان البلى بتاع العجل --- مفصلات الابواب --- ماتور المساحات و تحديدا الخلفى --- اما لو هتشترى من منطقة ساحلية زى اسكندرية فانصحك تاخد العربية و تروح ترفعها لفوق عند اى حد و تبص عليها من تحت عشان الفولكس عموما بيتأثر جدا بجو البحر و دايما تجيلة الباروما فى الابواب من اسفل و الحتة اللى ما بين العتب و الشاسية و الافضل هاتها مانيوال و ابعد عن الفتيس اللى اسمة DSG بيخرب بسرعة رهيبة غير كدة الباسات زى الفل و ثباتة راااااائع على الطريق و تحت الامطار كمان تقدر تشد بيها و انت مطمن و الزيت بيتغير كل ١٠,٠٠٠ كيلو و السير بتاع الماتور لو اصلى تغيرة كل ٩٠,٠٠٠ كيلو و لو مش اصلى كل ٥٠,٠٠٠ كيلو
و انا تحت امرك فى اى معلومة
|