السلام عليكم ورحمة الله وبركاته
حبيت أنقل تجربتي مع مرور فيصل في تجديد ترخيص السيارة نيسان صني (بدون فحص) لإفادة كل المقبلين على التجديد وهنبدأ بالخطوات..
1 - تصحى الساعة 7 صباحا تقريبا وتفطر وتاخد دش متين وتتكل على الله وتكون في المرور الساعة 30ر8.
2 - أول حاجة هاتقابلك وانت داخل أكشاك التأمين الإجباري (مش شرط شركة معينة كله واحد أنا أمنت تبع بنك بلوم) وبالضبط بتدفع 108 جنيهات فقط لا غير عن السنة الواحد (بالنسبة للصني طبعا، أو الـ1600 عموما).
3 - لو النمر جديدة بتشتري ورقة بيانات بـ 2 جنيه من عند أي حد واقف بره أو أي كشك جوه وبتروح على كشك لونه بني عليه علم مصر للعسكري علشان يملالك البيانات وبعدين تروح تختمها بختم النسر من باب حديد جنب شباك الاستعلامات.
4- تشتري من الخزنة نموذج تجديد لمدة سنة (أو 3 سنوات أهم حاجة تقوله علشان ما يحصلش غلط) وثمنه 10 جنيهات.
5 - وانت خارج من أي كشك هات ملف تجديد سنة (بـ 3 جنيهات) وتملا بياناتك.
6 - تخرج بره المرور وتلف شمال وتدخل على النيابة علشان تجيب شهادة براءة الذمة (المخالفات) بتقدم بطاقتك والرخصة القديمة وتستنى لما يندهوا على اسمك علشان تدفع المخالفات و5 جنيهات رسوم كده مش عارف بتاعة إيه (ما علينا) وتستلم الشهادة.
7- تروح على شباك الاستعلامات هاتلاقي أمين شرطة (ما كانش موجود قبل الثورة) هايراجع معاك الورق ويوقعلك على الملف من بره وتروح على شباك (1).
8- هاتلاقي موظفة هاتراجع معاك الورق وتقدرلك الضريبة وتديك بيها وصل (235 جنيها بالنسبة لعربيتي أو للـ 1600 سي سي عموما).
9- تروح على الخزنة وتقف في الطابور علشان تدفع الضريبة وبعدين تاخد إيصالين دفع واحد ليك وواحد للموظفة.
10- تقف على الشباك وتسلم الموظفة الإيصال والملف وتقعد تشرب سيجارة وتستنى يندهو اسمك في المايك علشان تستلم الرخصة.
11- تاخد الرخصة وتتشاهد وتطلع تجري بره المرور... هههههههههه
انطباعي عن المرور:-
1- الإيجابيات.. آخر مرة روحت رخصت فيها عربيتي القديمة لوحدي (بدون وساطة) أخدت مني 6 ساعات (من 9 إلى الساعة 2) المرة دي وعلى غير عادة مرور فيصل دخلت المرور الساعة 30ر8 خلصت الساعة 15ر10 يعني ساعتين إلا ربع.. والسر إن قبل الثورة كان كل مكان تلاقي شباك واحد بس هو اللي شغال إنما دلوقتي بقوا 2 أو 3 في كل مكان وده طبعا بينجز أكثر.
2- السلبيات.. الدنيا زي ماهي (وسايط) وإن خفت حدتها قليلا دا من جانب المرور.. وبالنسبة للناس بقت أكثر عدوانية على أي حد لابس بدلة ميري وللأسف دا مش صح.
في النهاية أتمنى اكون أفدت المقبلين وغير المقبلين على تجديد الترخيص، وتحياتي للجميع
(الموضوع مجهودي وغير منقول)