السلام عليكم ورحمة الله وبركاته
مرحبا بكل الأعضاء الكرام
كتير مننا بيسأل نفسه أجيب بوجيهات اه وكام شمعه وياترى النوع ده كويس ولا مش كويس
واللى عنده نظام الإشعال إليكترونى ، واللى عنده أبلاتين وكوندينسر زى حالاتى
انا من ألتراس الأبلاتين والكوندينسر بالمناسبة
وده الصراحة لعدم إهتمامى بالإشعال الإليكترونى (بالرغم من كفائته التى لا تقارن مع كفاءة النظام العادة وده لأسباب كتير يطول شرحها )
لكن الصراحة من فترة قريبة حصل قدامى موقف ناس كتير قعدت تفتى وتألف
وناس تقولك البوجيهات واحد الفرق بس انجيكشن وكربراتير
تجار قطع غيار عاوزين يمدوا ايديهم فى جيوب الناس ويغرفوا
وحدث ولا حرج فى النقطة دى بالذات
عموما البوجيهات 3 أنواع
نوع من غير مقاومة خالص وده لألتراس الأبلاتين والكوندينسر اللى زى حالاتى
نوع بمقاومة وده للأساتذة بتوع الإشعال الإليكترونى
نوع بينزل مخصوص للعربيات الإنجيكشن ومعروف عند بتوع قطع الغيار وده مايهمناش
اللى عنده إشعال إليكترونى يشترى النوع اللى فيه مقاومة لأن لو جاب العادة عمر ما العربية هتظبط وهيرجع يشتكى ان المشط طار ولسع ، وينزل يشترى واحد جديد
وكمان واحد جديد ويفضل يصرف وفى الآخر يقولك شوفت طظ فى الإشعال الإليكترونى يا عم انا هقلب أبلاتين وكوندينسر
وهو أساسا مرجعش للسبب الرئيسى وهو البوجيهات
حصلت قدامى وعن تجربى فى عربيتين شاهين و 132 وكانوا مركبين بوجيهات من غير مقاومه بصرف النظر عن النوع لكن المبدأ واحد انهم من غير مقاومة
وبعد ماركبوهم العربية مش بتظبط خالص وكل شوية المشط يلسع منهم
الأول خلاص باع العربية وعليها 3 أمشاط هدية ( ماشاء الله دلوقتى معاه نوبيرا وبيحطلها 80 )
والتانى لسه محتفظ بالعربية وماشى بطقم البوجيهات اللى فيه مقاومة انا أديتهوله هدية
مع العلم ان العربية قدامك واقفة متلتة مع ان البوجيهات كلها واصلها كهربا
وبعد ماركبنا الطقم اللى فيه مقاومة ماشاء الله العربية طلعت بجنبها
علشان ما أطولش عليكم الفديو شارح نفسه ولو اى حد عنده إستفسار يبلغنى