رد: مناقشة بين تصليح السيارات في مراكز الخدمة و الورش
اهلا بيكى فى مصر موتورز واسمحيلى احييكى على البدايه القوية والموضوعات الهامة والمتميزة فى الطرح
مبدئياً نصنف مراكز الخدمة :
1- مراكز خدمة التوكيل
2- ومراكز خدمة معتمدة
3 -ومراكز خدمة غير معتمدة
4- وورش اصلاح متخصصة وعامة
بالنسبة لاسعار قطع الغيار
كل ما كانت من مصدرها الاساسى (التوكيل) لازم تبقى اغلى علشان الموزعين يعرفو يبيعو وده فى اى نظام تجارى مش بس العربيات
فيه اسعار قطع غيار بتبقى بره التوكيل تماما لانها مش اصلية اساسا وان كانت ساعات بتبقى اقتصادية وكفاية
بس فى نفس الوقت فيه حاجات مهم تاخودها من التوكيل علشان تضمنها وتضمن تركيبها
فعليا انا مثلا لو محتاج بوجيهات تيل فوانيس صاج هجيبة من بره لكن لو محتاج موتور فتيس كنترولر هجيبة من التوكيل
وتعدد الخيارات شىء كويس بس المشكلة ان فى عربيات مبيبقاش فيه غير خيار التوكيل وبس وطبعا هنا بتبقى المعاناه بكل اشكالها
من ناحية اسعار الصيانة
غالبا مراكز الخدمة التابعة للتوكيل او المعتمدة او حتى غير المعتمدة طالما ماشية باسس هندسية وتجارية يبقى عندهم flat rate او نظام لتسعير المصنعيات قائم على سعر للساعة الواحدة
فمثلا الفلات ريت بيقول الساعة بعشرين جنية وتغيير التيل يتاخد نص ساعة وتغيير موتور بياخد عشر ساعات وهكذا بتتحدد سعر كل عملية
ميزة التوكيل ومراكز الخدمة المعتمدة ان ليها سياسة تسعير واحدة فى الغالب وبديك ضمان على شغلها
لكن طبعا تكاليف ادارة التوكيل ومراكز الخدمة الكبيرة مش زى تكاليف ورشة او مركز خدمة غير معتمد وبالتالى بتلاقى فروق كبيرة فى الاسعار احياينا وخاصة ان الورش والمراكز المعتمدة بيسعرو بمرونة اكبر
وبرضو مش كل عمليات الصيانة اللى اروح فيها للتوكيل فمثلا لو هغير وش سلندر ممكن فى التوكيل او مركز خدمة معتمد
اما لو هغير تيل ولا طقم بوجيهات ممكن فى ورشة عادية
وبرضو فيه عربيات لو هتغير فيها تيل حتى لازم فى التوكيل وهنا المعناه
احتمالات الخداع والتحايل وارده فى كل الانماط لكن فى التوكيلات ومراكز الخدمة المعتمدة سهل تثبت حقك بفواتير ومقايسات
سمعة التوكيل ومركز الخدمة وخبراته وتخصصة عامل جوهرى بيفرق بين توكيل وتانى ومركز خدمة والتانى وممكن يرفع من قيمة مركز مش معتمد عن توكيل بحالة
اعداد مركز الخدمة او التوكيل ونوعية الاجهزة عامل مهم
المتابعة وخدمة العملاء عامل مهم
علشان كده مينفعش نلغى مراكز الخدمة او الورش الاتنين مكملين لبعض والفروق بينهم كبيره وهامة بس المهم المستهلك يعرف امتى يلجاء لمين
والاهم ان العربية تسمح بتعدد الخيارت اساسا ومتقيدش مالكها بالتعامل مع التوكيل فقط
__________________
اخر موضوعاتى
قريباً تقرير وتجربة اداء دايهاتسو تريوس * تويوتا راش
|