[sayed2077]

السلام عليكم ورحمة الله وبركاته

طبعا كله عارف انى كان عندى بلية خشنه وكانت طول ما انا ماشى كان فيه موتسيكل صينى غلس ماشى جنبى ههههههههه

والحكاية من الاول كالاتى

طبعا انا جيت قبل الوقفه بيومين كان فيه مساعد ضارب زيت وجيت جبت واحد استيراد وضرب هو كمان ولما روحت اغيره ملقيتش غيره فاخدت الفلوس وبعدين يوم الوقفه روحت جبت جوز مساعدين جداد

ووبعد تركيبهم وتركيب العجل اكتشفنا ان البلية يمين خشنه وطبعا انا كنت مسافر تانى يوم العيد فقولت اغيرها بالمره علشان كده كده مسافرين ونبقى عاملت اللى عليا المهم روحت اشتريت بليتين لان العجله الواحده بتاخد بليتين وجينا نركبهم طلع ان المكان اللى بيركب فيه شميز البلية (الجزء الخارجى للبلى ) واسع فبالتالى الشميز بتاع البلية بينزل على طول من غير ما ينزل بالكبس (من غير ما ينزل بالعفيه ) وده مينفعش فطبعا لاننا كنا فى يوم الوقفه وكان بتوع الاستيراد خلاص قفلوا فعملنا تخشينه للبلية علشان تدخل بالعفيه ومتطلعش من مكنها وقفلنا وخلاص وركنت العربيه لغاية تانى يوم العيد اللى كنا مسافرين فيه وجينا رايحين السفر فضلنا طول الطريق واحنا رايحين كل الامور تمام لغاية ما عديت 100 كيلو من الطريق وهوب مره واحده لاحظت ان فيه صوت موتسيكل صينى ماشى جنبى ابص فى المرايات يمين ابص شمال مش لاقى موتسيكلات وفضلت كده لغاية ما ركنت على جنب اشوف فيه ايه ملقيتش فيه حاجه جيت كملت طريقى (كان فاضل 50 كيلو ونوصل ) طبعا كملت وصوت الموتسيكل الصينى مفارقنيش طول الطريق ههههههههههههههه انا ساعتها شكيت فى البلى اللى ركبناه بس قولت لما نرجع مصر يحلها ربنا والحمد لله قضينا اليوم ورجعنا بنفس صوت الموتسيكل الصينى بس كنت ماشى على 80 بس وانا راجع علشان الامان ورجعت وطبعا استنيت لغاية ما كله فتح وروحت عند الاسطى محمد اللى بتعامل معاه قالى كده خلاص المكان ده وحش ولازم نعمله شميز للبلى علشان ميحصلش حاجه للبلى الجديد روحت اشتريت بلى و جوانات اللى بتركب على البلى علشان الشحم ميطلعش من مكانه بحوالى 100 جنيه وروحت عند الخراط وكان حوارى كالتالى عاوزين نعمل شميز فى قالى بس هيكلفك قلتله كام قالى 90 جنية قلتله طيب لو جبت جنب استيراد افضل قالى اه قلتله ماشى روحت عند اللى بتعامل معاه فى الاستيراد فى المعادى لقيت كل اللى عنده جنب شمال للاسف مفيش يمين خالص طبعا روحت البيت ومش عارف اعمل ايه وصوت البلية بقى عالى اووى وانا دايما بحب الهدؤ فى السواقه المهم جيت امبارح طالع على حلوان كالمعتاد علشان افول 80 من هناك فا وانا ماشى عند المعصرة لقيت بتوع قطع غيار استيراد فروحت عند اول واحد سألته طلع كل اللى عنده جنب شمال (معرفش ايه حكاية الشمال معايا ) سألت عند المحل الجنبة قعد يدور برضوا كان كل اللى عنده جنب شمال برضوا ههههههههههه فلقيته بيقولى بص تعالى نروح المخزن وادورك على جنب يمين هناك قلتله يالا بينا روحنا المخزن الاول بتاعه وده قريب شوية من المحل قعد يدور بتاع ربع ساعه وفى الاخر لقيته جاى فاضى فبقوله ايه مفيش قالى لا كل اللى موجود جنب شمال ههههههههههههههههه (الظاهر حد عملى عمل انى الاقى جنب شمال بس ) فلاقيته بيقولى خلاص تعالى نطلع على 15 مايو فى المخزن الكبير وان شاء الله هلاقى هناك قلتله يالا بينا طبعا مشينا والطريق فاضى المشوار اخد حوالى ربع ساعه رايح وربع ساعه جاى لوحده و الحمد لله لقينه هناك جنب يمين اخيرا وكان جايبه بمستر الفرامل بالتيل وروحنا المحل قالى خد المستر مع الجنب على 175 جنية قلتله والله بص الفلوس مش مكملة معايا وادينى الجنب بس قالى ماشى راح فاكك الماستر بتاع الفرامل وحاسبته على 150 جنية حق الجنب مع العلم ان السعر ده فى جميع المحلات ومرضيش ينزل جنية حتى المهم طبعا روحت ما صدقت واخدت الجنب وروحت فولت العربيه لان مكنش فيها نقطه بنزين خلاص وطرت طيران على البيت و روحت عند الاسطى محمد والحمد لله شيلنا الجنب القديم وركبنا الجنب الجديد ببلية بطنبورته بسورته (شيل جنب وحط جنب ) وطلعت جربت بجد وحشنى صوت العربيه الاصلى اووى ياااااااااااه على الهدوء ايه الروعه ديه بجد بسم الله ماشاء الله الله اكبر رجعت الاكسيل بتاعت زمان والصوت راح خلاص

وشيلت الجنب القديم طبعا قطع غيار لو عوزت فى المستقبل (طنبورة أو سرة )طبعا الدشمة بايظه والبلى بايظ

وطبعا عرفت ان ممكن تشترى جنب الاكسنت مع مساعد الاكسنت ويتركبوا عادى على الاكسيل اهم حاجه يكون الجنب اكسنت والمساعد اكسنت وده طبعا افضل لان قطع غيار الاكسنت متوفرة اكتر من قطع غيار الاكسيل شوية بسيطه طبعا علشان الاكسيل تعتبر قديمة برضوا فالافضل لوة حد هيغير جنب ومساعدين يجيبهم اكسنت يبقى احسنله

وكمان ديه بعض الاسعار اللى عرفتها عن الاكسيل

الماتور والفتيس = 3500 جنية

فرش الابواب اعتقد يأما الجوز ب 150 ياما فرش الباب الواحد ب 150
معلش الزهايمر بقى

و
نظام كامل باور استرينج الطرمبة بالخزان بالاسكترا بالخراطيم = 750 جنية
المساعد بسوستته ببطاحته = 150

الجنب كامل = 150

وديه بعض صور الجنب القديم











و

السلام عليكم ورحمة الله وبركاته