[Felefel Ahmed]

المشاركة الأصلية كتبت بواسطة abosamra مساء الخير خبطت فى الرصيف بالعجلة الأمامية يمين و الجنط اتعوج ، رحت استعدلته عند بتاع الكاوتش بس حاسس انالعربية مس زى الآول وباسمع صوت صفارة من ناحية العجلة زى صوصوة خصوصا فى السرعات القليلة ايه الحل الترصيص و لا اغير الجنط و ينفع اغير جنط واحد؟

السلام عليكم
أولا ألف سلامه والحمد لله جت فى الصفيح وانت بخير بحمد الله
أنت عندك حوار طويل بس سهل بأذن الله - ونمسك الموضوع بالترتيب
أنا حتكلم عن مشكلتك وأشرح حبت حاجات فى السكه

1- الجنط
الجنط مينفعش تعدله عند بتاع كاوتش لازم عند واحد بتاع تصليح جنوط علشان يظبط ميزان ميه علي القطر كله (أي عوجه بسيطه تبرجل العربيه)
بتوع تصليح كاوتش
- الأسكندريه ( ميدان كابو فى الحضره أسمه الحاج محمود) لو جنط عادي 30 جنيه لو نيكل 90 جنيه
- القاهره (شارع الملك الصالح من الكرنيش أسمه مينا) جنط عادي 20 جنيه
بدل الفرده المخبوطه وحطها ورا وشوف (لو لسا الصوت يبقى حوار من ألي تحت) بس فى كل الحالات لازم تظبط الجنط ولو سليم حيقولك ده سليم (مش حتخصر المشوار أهو تطمن)

2- رمان البيل
وده بالبلدى عباره عن مجموعه بلي فى علبه وبيلفو
لو باظ حتسمع صون ونه مع السرعه وممكن يروح مع السرعه العاليه لو الرمان مش بايظ تماما
رمان البيل الأمامى بيعمل 120 جنيه (فرده واحده مش طقم) الطقم صعب تلاقيه وده ب 200 جنيه

3- الصره
لازم تشيك عليها (انا مش عارف سعرها ) بس لو معوجه لازم تغيرها فورا علشان ديه تؤثر على الطنبير وبالتالى تاكل كاوتش وتيل

4- المساعد
لازم تشيك عليها (والمساعد مكون من 3 أجزاء)
أ) البطاحه , وديه ألي محمله المساعد علي جسم العربيه , شغلتها أن حمل المساعد ميسمعش فى جسم العربيه
لو الخبطه هزت البطاحا أو مسمار ريح أي هزه فى المساعد تسمع فى كل جسم السياره يعنى صوصوه وهوهوا وكل الحيوانات
ب) الياي , السوسته بالبلدي ألي بين المساعد والبطاحه , وديه صعب تتعوج بس مع الزمن بتريح, بس شيك علي الجلب ألى بين البطاحه والياي (لو بيظه مش حتسمع صوصوه بس حتسمع تكه فى المطبات

ج) المساعد نفسه وده لو لاحظت ماسورتين بيدخلو فى بعض شبه المنفاخ لو المساعد بايظ تعرف أزاي (1- هز العربيه من فوقه بالظبط وبعدين من فوق المساعد التانى لو لقيته ناشف فى الرد لفوق يبقي يتغير )(2- تلاقي زيت على المساعد ) وفى كلا الحالتين لازم تغير المساعدين (2) فورا
طقم المساعد الأمامي 400 الي 500 جنيه وطبعا فيه ب 250 جنيه بس ده ممكن لو انت غاوي تغير مساعد كل شهر
أنا بستخدم نوع أسمه مندو وده ب 450 جنيه وزي الفل
طقم المساعد الخلفى مندو ب 380 جنيه

وطبعا لازم تظبط زوايا و ترصص

مستنى ردك وطمني عملت أيه