انا اسف يا باشا لسه واخد بالى من سؤالك
هى طبعاً عربيه مختلفه كلياً عن اى عربيه تانية وده نتيجة اختلاف حقيقى فى هندستها بدايه من توزيع الوزن للدفع الخلفى ونظم التحكم والثبات ومليون حاجة وحاجة لا يتسع المجال لذكرهم كلهم وياريت تقراء موضوعى عن العربيه ديه
http://www.masrmotors.com/vb/showthread.php?t=72199
موضوع السعر بقى طبيعى ان اخر موديلات كل جيل تبقى اغلى شويتين من الباقى
وده لان اواخر الموديلات بتبقى الاحدث طبعاً وكمان اتعالج فيها اغلب المشاكل اللى بتظهر فى اوائل الموديلات وكمان الشكل بيبقى احدث (فيس ليفت جديد) وكمان التوكيل بيبقى منزلها بكماليات اكتر
العربيه ديه اول مانزلت فى 2006 مكانش فيها مثبت سرعة حتى وفى اعلى الموديلات والتكييف الديجتال وفتحة السقف مكانتش بتنزل الا فى اعلى فئه فى ال 316
وال 320 كانت من غير فتحة سقف ولا اى درايف ولا مثبت سرعة واسمها اعلى فئه
وهكذا شوية شوية بيعلو التجهيزات والكماليات
فالسعر ممكن يكون زيادة شوية وممكن يكون مقبول حسب الحالة والكشف عليها فى التوكيل او مركز خدمة معتمد او ورشة متخصصة فى بى ام فقط
وانا فى رائى السعر ده كتير على عربيه راشة وممكن تجيب بيه حاجة فابريكا بره وجوة
اخيراً موضوع المطبات ده علشان متضايقش بعد كدة انا بقولك من دلوقتى اهوه فيه مطبات كتييييييييييير هتقابلها بفن من غير فن هتحك حتى لو انت قاعد فى العربيه لوحدة ووزنك 60 كيلو هتحك انا عارف بقولك ايه
ومش بتكلم عن المطبات المعمولة صح فى بعض الاماكن فى المدن الجديدة الرحاب والتجمع والشروق والكلام ده لاء انا بكلمك على المطبات البلدى اللى عم عوض وعم فاروق جابو شوية دبش على جبس واسمنت وعملوها فى نص ساعة
وانزل ارفع واتفرج على البى امات موديلات كام سنة فاتو وشوف اثار المطبات فى التصفيح السلفى عاملة ايه وده كله كوم ووانت مركب معاك حد كوم تانى
يعنى مشوار عائلى والمدام جمبك واتنين بالغين واراك مش هقول تلاته مفيش مطب بلدى فيكى يا جمهورية الا لما هتمسح العربيه فيه مسح مش حك كمان انا بقولك اهوه
وموضوع الكاوتش خد بالك لو باظت فردة هترميها الران فلات مبتصلحش وغالباً هتجيب بدالها جوز مش واحدة علشان تركب جوز قصاد جوز وتخلى التانية عندك استبن فى البيت
وسعر الواحدة مابين 1200 - 1300 جنية
وقبل ما تجيبها ظبط مع ميكانيكى او مركز خدمة متخصص فى البى ام علشان تتابع معاه صيانتها
وتحت امرك فى اى استفسار