[فادى]

المشاركة الأصلية كتبت بواسطة Nissan ثبات مخجل على الطرق السريعة ثبات معقول فى المنحنيات مش فاهم ممكن توضح اكتر و على العموم شكرا على تقييمك و انا بحب الشاهين بس الشكل ممكن تقييمى لية يكون اقل من تقييمك لانه بيفتقد الإيروداينمكس بشكل كبير

بعض السيارات قد تكون ثابتة فى المنحنيات و لكنها لا تكون ثابتة على السرعات العالية,
و العكس.
فمثلا السيارات الأمريكية الكبيرة ثابتة عادة و مريحة على الطرق السريعة, و لكنها سرعان ما تتمايل مع أى منحنى, بفضل نظام التعليق الناعم, و وزنها الثقيل الذى يتسبب بتكبير قوى الدفع الجانبية.
الفكرة هنا أن الثبات ينقسم الى نوعين, الثبات فى المنحنيات و أثناء الفرملة و الانطلاق,
و الثبات عند السير بسرعة كبيرة فى خط مستقيم.
الثبات فى المنحنيات تتحكم به عدة عوامل, منها :
قسوة التعليق : عندما يكون التعليق قاسيا, يقلل ذلك من تمايل جسم السيارة أثناء الانحناء, و يحافظ بالتالى على توزيع الوزن المثالى قدر الأمكان,
اذا كان التعليق ناعما, تميل السيارة عكس ناحية المنحنى بسهولة, يؤدى ذلك الى أن يصبح الوزن الفعلى على العجلات فى ناحية المنحنى صغيرا و قد يصل الى صفر, يساعد ذلك على انزلاق هذه العجلات بشكل اسرع لأن احتكاكها بالأرض اصبح صفر.
بالمثل عند الفرملة العنيفة, ترتفع مؤخرة السيارة و ينتقل الوزن للأمام, و عندها قد تفقد العجلات الخلفية ثباتها نتيجة لانعدام الوزن عليها الذى انتقل كله الى العجلات الأمامية, و لذا فاذا قمت بالالتفاف مع الفرامل تدور السيارة حول نفسها.
عشان كده ميفرقش معايا وزن العربية فى هذه الحالات, لأن ممكن وزن العربية يكون 2 طن كلهم على العجل الأمامى و مفيش اى وزن ورا!
لما أعمل نظام تعليق ناشف, يبقى انا قللت كثيرا من هذه التأثيرات و حافظت على توزيع الوزن لأقصى حد.

النقطة التانية المهمة هى نظام الدفع, فى الدفع الخلفى الوزن بيبقى متوزع بنسب مساوية أو على الأق متقاربة على العجل الأمامى و الخلفى, و ده بيخلى العربية أكثر ثباتا لأن العجل كله له ثبات موحد, ده بالاضافة انو فى حالة الانطلاق مثلا, طبيعى انو العربية بترتفع من الأمام, و بتنخفض من الخلف أى ان الوزن ينتقل من الأمام الى الخلف, على العجلات الخلفية, لو الدفع خلفى اذن ده فى مصلحة الثبات لأن العجل الخلفى هو الدافع و هو الأكثر ثباتا, فى الدفع الأمامى العجل الأمامى هو الأقل ثباتا و هو الدافع, و ده بيخلى العربية تنزلق عند الانطلاق أو عند الضغط على الوقود بقوة و بيقلل من ثباتها اثناء الانعطاف مع الضغط على البنزين و دى بتعرف بال"اندير ستيرنج", ده غير ظاهرة المحاور غير المتساوية, التى تتسبب فى تفاوت سرعة العجلات.

نقطة برضو مهمة, ناس كتير بتعتقد انو كلما زاد وزن السيارة كلما زاد ثباتها فى المنحنيات و ده خطأ تماما, بالعكس, فى المنحنى بيبقى فيه قوى دفع جانبية على السيارة, القوى ديه بتتناسب مع كتلة السيارة, يعنى كلما زاد وزن السيارة, كلما زادت القوى الجانبية.

النوع التانى من الثبات على الطرق السريعة بتحكمه عوامل تانية خالص منها:

عندما تسير السيارة بسرعة كبيرة, بتكون المشكلة الأساسية هى الهواء المواجه لها, الهواء ده بيخش من تحتها و بيعمل تخلخل للضغط من تحت العربية و فوقها, فبيقل وزن السيارة الفعلى على الطريق, لأن الضغط تحتيها أعلى من فوقيها, نفس فكرة الطيارة بالضبط, سرعتها بتعمل تخلخل فى الضغط, الى ان يصل الى مرحلة انها ترتفع عن الأرض اى ان وزنها الفعلى اصبح بالسالب.

قلنا انو الدفع الخلفى افضل فى المنحنيات و فى الانطلاق عشان مفيهوش ظاهرة الاندير ستيرنج, على العكس تماما, الدفع الأمامى أفضل على الطرق السريعة, لأن الوزن عامة متركز فى الأمام فى مواجهة الهواء, بيديلنا ثبات أكتر للعجل الأمامى الموجه للسيارة, و عشان كده الدفع الأمامى مناسب أكثر للسيارات الصغيرة لأنه بيديلها ثبات على الطرق السريعة بعدما كان من الجنون السفر بسيارة صغيرة.
برضو الوزن العام, قلنا انو بيقلل من ثبات العربية فى المنحنيات, لكن على العكس تماما هنا, بيزيد من ثباتها على الطرق السريعة, لأنه بيزود الوزن الفعلى على الطريق.
طبعا بيعتمد على عوامل اخرى كتيرة زى الايروديناميكية, كلما كانت افضل, نجحت السيارة فى الحفاظ على ثباتها بشكل افضل لأن تخلخل الضغط هيقل, و طبعا انخفاض نقطة الثقل الى بيقلل من تخلخل الضغط.