[waleed_es]

المشاركة الأصلية كتبت بواسطة Mohamed Magdy عملت صيانة الـ 5000 لكن مقدرش احكم دلوقتى على التوكيل سواء بالايجاب او السلب

هقولكم عن تجربتى فى صيانة 10 الاف كيلو. أنا روحت من يومين توكيل العبور اعمل صيانة ال 10 الاف، وطبعا بحاول قبلها بشهر ان أحجز لكن كتير محدش بيرد وبعدين قالولى بيانات الصيانة اللى فاتت مش مسجله عندنا وهاتلنا رقم الشاسية اللى كان فى الرخصة والرخصة فى العربية وبنسى كل يوم اجيبها معايا او اجيب رقم الشاسية، المهم علشان موجعش دماغكوا حجزت لكن ميعاد الحجز كان غصب عنى هعدى ال 10 الاف ومش عارف اعمل ايه فى موضوع الزيت، سألت هنا فى المنتدى لو فيه خطورة انى اسيب الزيت لما اروح الصيانة حتى لو زادت الكيلوهات محدش للأسف عبرنى، المهم خفت على العربية وغيرت الزيت بره ومعاه الفلتر طبعا. لما روحت بقى وقولتلهم الكلام ده عملولى محاكمة، دى كده تخرج من الضمان ومش عارف ايه، المهم بعد جدال قالولى اخر مرة تغير بره وقولتلهم ماشى. من المرة اللى فاتت كان فيه عندى مشكلة فى صوت التكييف وقالى المهندس ان المرة الجاية هنكشف على المروحة وممكن نغيرها فى الضمان وكان عندى صفارة فى التيل الخلفى لما امسك فرامل على البطيء وقالوا عملناها وبعد ما مشيت فوجئت انها موجودة زى ما هى. أكدت انا أول امبارح على الجزئية دى والحمد لله اتحلت يوم واحد بس وامبارح موجودة تانى طبعا دى فى الغالب عايزة صنفرة للتيل وطبعا لحد فك يبص على تيل ولا غيره. نسيت اقولكم انى لما اتحركت بالعربية لقيتها موجودة ورجعتلهم تانى وقالوا عملوها من غير ما يبصوا على تيل ولا غيره تقريبا استخدموا كمبروسور الهواء وراحت أول يوم واشتغلت تانى امبارح. ناس زووق زووق زووق. الحاجة التانية كان عندى خبطة فى الكشاف اليمين،خبطه من حنطور راكبه حنطور، المهم خبط الرفرفر واثر على الكشاف ، المشبك اللى ماسكه من فوق اتكسر، فقولتلهم حلولى المشكلة دى، البيه قالى لازم نغير الكشاف بالكامل لأن إطار الكشاف مش موجود. ونسيت اقولكم التكييف قالى معلش اصل لازم العربية تبات عندنا، وكان المرة اللى فاتت زميله قالى تيجى بس بدرى، وفعلا جيت بدرى (اتأخرت ساعة الا ربع بس ههههه). المهم احلى حاجة ان العربية اتغسلت وانا ماشى وبالشفا، دا توكيل رينو العبور، ويارت اسمع ردودكم وتجاربكم اللذيذة. المستفاد من الرغى دا كله ان التوكيل كله اشتغالات، برضه مش عايز اظلمهم لأنى مجربتش غيرهم دى اول عربية زيرو اركبها.