مميزات الهاف بور الى بيتركب للادا
أنا معايا لادا 2107 موديل 2007 وركبتلها أسكاترا (هاف بور) لان الدركسيون كان تقيل جدا و التعديل دا انا عملته قبل كده فى عربيه كانت عندنا مو1983 و هو فكره ناجحه جداً لانها:-
1- بتخلى الدركسيون أخف كتير.
2-الإسكاترا بتخلى العربيه ثابته أكثر على الطريق لأنها مبيكونش فيها بوش زى الى بيكون موجود فى علبه الدركسيون.
3- الحداد أوبتاع العفشه الى بيركب الإسكاترا بيقدر يتحكم فى زاويه فتح العجل بأنه بيزود فى طول عمود الإسكاتره الى أقصى حد ممكن فالعجل بيفتح بزاويه أكبر من الأول ودا طبعا بيخلى العربيه أحسن لو بتلف في مكان ضيق.
4-ما بتخدش اى حاجه من عزم الموتور كما هو الحال فى طرمبه البور.
الأسكاترا راكبه فى العربيه مو1983 بقالها حوالى 5سنين و راكبه فى ال2007 من سنه تقريباً ومفيش فيهم اى مشاكل نهائى.
الكاليف :-- الحداد أو بتاع العفشه أخد 700 جنيه ودا تمن الأسكاترا + مشترك الشكمان الى بيتغير لان الى ركب بيكون في المكان الى هتركب فيه الإسكاترا+مصنعيه.... وبعدين بيعت علبه الدركسيون القديمه ب275جنيه تمنها جديد450 والحداد باع البيض القديم ب100جنيه
التكلفه : 700-(275+100)=325جنيه
ملحوظه :-
انا الي ركبلى الإسكاترا هو فى الأصل مهندس و دايما بشوف ناس بتعمل عنه التعديل ده
فلازم محدش يعدل غير عند حد فاهم و عمل التعديل دا قبل كده وإذا كان ينفع تخلى الفنى الى هتعدل العربيه عنده يخليك تجرب اى عربيه هو عملها قبل كده لأنى سمعت أن الاسكاترا لو ركبت غلط الدركسيون هيكون خفيف لاكن هتلاقى العربيه بتعوم على الطريق .
فى النهايه التعديل دا لو اتعمل مظبوط بيغير طعم العربيه خالص و أتمنى انها تنزل بيه من المصنع
مع تمنياتى للجميع بالتوفيق .
|