المشاركة الأصلية كتبت بواسطة corsair
انا ملاحظ اوي ان الهجوم وصل علي الفيرنا بخصوص السرعه ان بعد ما تجيب 120 السيارة بتكون بالسلامة ضايعة انا لسه جي امبارح من المنيا وواخد طريق الصحراوي الغربي وماشي 190 وال RBM كان علي 5.5 والعربية بسم الله ما شاء الله زي الالف وثباتها كان جميل وكانت والله عايزه تزود السرعه تاني بس انا قولت كفايا 190 بلاش اجري اكتر من كدا وبجد ثبات روعه بس زعلتني بالنسبة لاستهلاك البنزين خدت 40 لتر بنزين في 500 كيلو هل كدا استهلاك كتير بالنسبة للسرعه اللي كنت ماشي عليها ولا ده عادي واستهلاك مظبوط للعربية
|
اولا/ حمدا لله على سلامتك
ثانيا / ومع احترامنا ليك ولكل اللى ردو عليك ولاواحد فيكو بيسوق طرق سريعة كل يوم ولا له تجارب كتير مع الطرق السريعة وطبعا مردوش بطريقة فيها نوع من التجربة او الخبرة واما اللى اشادو بيها فهما زى حالاتك مقتنعين بيها جدا و دى ناحية نفسية طالما الاسان بيحب شىء مبيشوفش عيوبه واحد اخواننا كاتب هنا موضوع انه عايز يشترى الفيرنا وسمع انهم هيبطلو انتاجها وانا تقريبا فهمت انه هو مش متصور حياته بدون الفيرنا ( دى مبالغة منى بس علشان اوصل الاحساس اللى جالى لما قريت كلامه) ولايقبل اى ماركة تانيه غيرها
هل تعلم ياصديقى ان
الفيرنا سيارة صغيرة تنتمى الى فئة السيارات الصغيره وان موتوررها كبير على هذا الجسم ويغرى على الجرى الغير مناسب لجسم السيارة فطول وعرض وارتفاع العربية مهما كان نظام التعليق والعفشة فيها لابد ان يتناسب مع قدرة الموتور ولذلك اليابانيين مش بيهرجو زى الكوريين لان حياة الانسان تهمهم فمثلا السيارة اللانسر 1600 تجدها اكبر من ال1300 وفيه قاعدة معروفة ان العربية لما الاوزان اللى جواها تزيد ده بيثبت العربية وبيقلل تسارعها او السحب بتاعها ومعروف ان اى شخص حجمه كبير ده بيمسك وزنه فى الارض وعلشان كده لو واحد تخين قعد على كتفى انا مثلا هيبططنى وهكذا وانت بنفسك فى احد ردودك قلت انك متقدرش تقارن ثبات الفيرنا بالهوندا طيب ليه مهو الموتور تقريبا واحد وانظمة التعليق تقريبا واحدة لكن هنا بقى طول وعرض وارتفاع العربية هو اللى بيخليك متحسش بموتور العربية القوى
هل تعلم ان
معظم الحوادث التى رايتها للملاكى على الطرق السريعة كانت فى معظمها للفيرنا و دى ملحوطة غريبة واكدها لى امين شرطة ماسك تأمين المحور ركب معايا مرة لحد اسكندرية واكد كلامى لما قال بالحرف احنا بنشوف بلاوى كل يوم لكن اللى بستغرب له انى مش بشوف مرسيدس او بى ام دبليو عاملة البلاوى دى كلها عربيات صغيرة لكن ملحوطة معظم ماركات الصغيرة دى فيرنا دى بتاعتى انا
وهل تعلم ان
حظك جميل وانك لاتجروء وده مش تسخين ليك بس دى حقيقة انك تعمل السرعة دى على طريق القاهرة اسكندرية الصحراوى ولا حتى اسيوط القاهرة الشرقى طيب ليه
لان االقاهرة اسيوط الغربى اللى انت مشيت عليه منحنياته قليلة وطريق عدل والضغط عليه قليل ولذلك اسفلته كويس مفيهوش مشاكل وواضح انك جاى بالنهار لانك جريت بالسرعة دى مع واحد تانى رغم ان الطريق حارتين فقط و ده معناه ان الطريق كان فاضى لكن القاهرة اسكندرية واسيوط القاهرة الشرقى ال2منحنياتهم كتيرة وفيها منحنيات صعبه شوية هيبان فيها ثبات الفيرنا بقى ليه لان معنى كلمة ثبات مش انك تمشى فى طريق عدل وكويس بسرعة عاليه وخلاص لأ وانما العربيات الكبيرة وانا هتكلم هنا عن النيسان الصنى بتاعتى لانها مع المنحنيات الخطيرة متنقلبش لان اللى بيحصل ان انظمة التعليق بتاعتها بترتفع عن الارض ففى المنحنيات بحيث جسم العربية مهما انحنى الطريق يبقى عامل زاوية 90 درجه مع الطريق هو ده الثبات بقى اللى انت مجربتوش ولو سمحت متجربوش بسرعات عالية فى المنحنيات لان الطبيعى فى المنحنيات تهدى السرعة لكن دى شفتها وجربتها واذكر مرة جاى من اسكندرية ماشى بسرعة 185 ولقيت فيرنا كنت عديت منها صعب عليه نفسه ولقيته جرى ورايا فوسعت له عدى من جنبى زى الطلقة ففهمت انه ماشى على الاقل 200 فنزلت السرعة لانه هيعمل مصيبة وقد كان بعد 200 او 300 متر تقريبا العربيه دارت حوالين نفسها واخدت الصحراوى بالعرض واتقلبت فى الصحراوى ولما وقفت وجريت عليهم لقيتهم مجموعة شباب مشغلين كاسيت بصوت عالى (يمكن هو السبب ههههه ) فجريت جبت ازازة ميه من عربيتى علشان يشربو ويرشو على نفسهم بعد م طلعناهم فبـص لى اللى كان سايق ولما شافنى روحت اجيب ازازة ميه تانية من النيسان النبيتى رماها ف وشى وفهمت انه معتقد ان السباق بيننا سبب الحادثة مش تهوره اذن لازم تعرف قدرات العربية اللى انت راكبها وحكاية الار بى ام .5,5 ده فظيع و ده معناه انك مديتهاش الغيار الخامس او مفيهاش خامس اصلا لان مفروض ان الار بى ام لايزيد عن 4 والا يبقى خطر على موتور العربية انا شخصيا وصلت 200 بالنيسان الصنى على الغيار ال5 ولم يتعدى الار بى ام 4,3
وهل تعلم ان
سعادتك وده من كرم ربنا عليك انك من الواضح جدا انك ممشيتش بالسرعة دى اكتر من نص ساعة على بعضها ده ان مكانش اقل لكن لو جريت مثلا 180 زى حالاتى من القاهرة لحد مطروح (450 كيلو)كنت هتعرف العربية دى اخبارها ايه
ثم من الواضح ايضا انها جديدة يعنى معملتش 5000 كيلو على بعض وعلشان كده حسيت انها ثابته لان انظمة التعليق لسه جديدة وم اتعرضتش لشوارعنا الرهيبة باستمرار
اما النكتة الكبيرة حكاية الهجوم اللى زاد على الفيرنا وكاننا منافسين لغبور مثلا و العربية دى واكلة السوق مننا وموقفة حال مصانعنا واحنا ممكن نقفل ونفلس بسببها طيب اهو اصحابها نفسهم هيبطلو انتاجها السنة دى يعنى مفيش فيرنا موديل 2011ولو هيا ناجحة فعلا زى ال128 مثلا م انتجوهاش تانى ليه الصنى مثلا بتنتج من سنة 1992 وحتى الان فى 10 مصانع حول العالم يمكن فى مصر احنا مش متقبلينها على م اظن واللانسر من 1996 او 1995 وال128 من 1965 وحتى 2000 عندنا لان وقف انتاجها فى ايطاليا 1972
انا مش بكرهك فيها هيا عربية صغيرة معقول جدا عليها الاستعمال العادى وجميلة ولذيذة ومناسسبة لينا كمصريين لكن منحملهاش اكتر من طاقتها
اعتقد لازم نكون عقلانيين شوية فى الحكم على الاشياء
اخيرا لاننا نحبك فى الله فارجوك ارجوك ارجوك متعملش كده تانى