[dr_eslam_66]

• العربية بتبدأ الدوارة بدون مشاكل ولا أي هزات غير طبيعية.
• بداية الحركة مافيش فيها مشكلة.
• أول هزة خفييييفة قوي ومش ملحوظة بتبدأ وأنا بسحب من 60 لحد 65 ودا طبعا أنا ببقى في أول الحركة وببقى دايس بنزين شوية.
• العربية بتبقى تماما لحد بعد الـ80 بحاجة بسيطة ولو أنا بس مشعر بنزين تبدأ الرجة ولو كنت بسحب تلاقيها مراجيح مولد النبي وبيستمر الحال دا لحد حوالي 110 وبعديها بتهدى ولاكن أنا بحس إني التردد بتاع الهزة هوا الي علي فا علشان كدة مش بحس بيها لاكن بعد ال110 مابتبقاش فيه حاجة تقلق.
• الرجة عبارة عن رعشة أول ما بحس بيها بتبقى في الكرسي ياعني رجة في العربية كلها مش دركسيون ولما بتزيد بتسمع تحت رجلي في الدواسة.
• أول ما أشيل رجلي من على البنزين تختفي الرجة.
• لو أنا بتابع نفس المسلسل وأنا بنزل بقى السرعة من 130 لحد 60 مثلا ,, لا يوجد أي رجة ولا هزة ولا أي شيء من هذا القبيل ,, طبعا انا بسيب العربية تتهادى مع نفسها وببقى قاصد ما أدوسشي فرامل علشان أعرف أحكم على تصرفها.

العربية: كرولا 2002 1.8 أوتو
القصة:
أنا كنت بعمل صيانة شاملة للعربية قبل التجديد وكمال بمناسبة تقفيل الـ 200 ألف كيلو.
غيرت الكاوتش والبطارية والزيوت والفاتر والسيور والبوجيهات وكله بقى زي الفل ماعدا حاجة واحدة بس,
وبعد فترة كبيرة حوالي شهرين أو تلاتة من هدوؤ تااام وإتزان ملاحظ على العربية بعد تغيير الكاوتش الي كانت حالته تصعب على الكافر بدئت تظهر رجّة في العربية كلها فوق سرعة الـ 100 وبتنتهي على 120, الي لاحظته بقى إني لما بكون في عز الرجة وبشيل رجلي من البنزين بتروح ولما برجع أدوس بنزين تاني بتظهر شكيت في الماتور ولاكن قولت بالطبيعي كدة دي ترصيص أو عيب كاوتش.
طلعت على الراجل بتاع الكاوتش والراجل ما إعترضشي خالص طلعنا نجرب العربية وفعلا قالي آه دي ترصيص وفي الفردتين الي ورى لأني العربية كلها هيا الي بتترج والدركسيون ثابت ورجعنا شيكنا على الترصيص وكنت مصر يشيك عليه قبل مايفك الرصاصتين بتوع الترصيص علشان أبقى متأكد برضو لقيت الترصيص مظبوط وبعيني المهم الراجل فك الرصاصتين وعاد الترصيص تاني وركب الفردتين وفتح الكبوت وقالي تعالى بص,
الماتور سايب وبيترج مع كل غيار والقاعدة الي ورى الي هيا على الجير لقيتها مقطوعة تماما.
المهم ماكدبتش خبر وخدت الموضوع بجدية وروحت غيرت تلات قواعد من الأربعة (توفير بقى) ومشيت من عند الميكانيكي وأنا مبسوط الرجة قلت خااالص ولاكن مازالت ملحوظة على خفيف قولت أنا أكيد موسوس وبشتغل نفسي.
بعد فترة حوالي إسبوع أو أقل زادت تاني الرجة وظهرت زي الأول مع غختلاف السرعة الي بتظهر عليها كانت حوالي 80 لحد 90 رجعت للميكانيكي تاني قالي لأ لازم تغير القاعدة الي فاضلة الي هيا الرابعة وفعلا غيرتها.
طلعت من عنده الوضع ما إتحسنش كتير ومش حاسس إنه فيه شيء إتغير غير إني يوم تلاقيها هادية شوية ويوم الرجة ملحوظة جدا.
أرجووووو المساعدة هل أنا غلطان والقواعد مافيهاش حاجة وفيه حاجة تانية قولولي عليها طيب الله يكرمكوا,
طيب أروح عند حد تاني يربطلي تاني على القواعد الي ركبتها أولردي...
طيب أرجع أرصص عند واحد تاني قد يكون الكاوتش فيه حاجة والواد مارضيش يقولي من الأول علشان الضمان وماقرفوش بقى وأقوله مش لازمني.
أنا خلاص دماغي هتشت والله.
الرجة دي بتزيد كل فترة ومش بتهدى ولا حتى بتثبت وأنا مش عارف أتصرف لقلة خبرتي تماما في الميكانيكا.