[sayed2077]

السلام عليكم ورحمة الله وبركاته

بمناسبة افتراقى انا و عزيزة عربيتى ال 128
فقررت عمل هذا الموضوع لتوضيح اكثر واكبر مشكله فى سيارة ال 128
وهى شروخ الشاسيه

اولا ليه الشاسيه بتاع ال 128 بيشرخ؟

الجواب

لان ال 128 الصاج بتاعها ضعيف جدا وسمكه قليل كمان نقدر نقول ان طريقة التصميم مكنش معمول فى الحسبان ان ال 128 هتدخل الجبال المصرية اللى عندنا ديه
ونقدر نلخص الموضوع فى الاتى
1:صاج ضعيف(سمكه قليل)
2:طريقة تصميم خاطئة من الاساس(مكنوش يعرفوا انها هتمشى فى جبال)
3:استرخاص علشان يبيعوا العربيه باقل سعر ممكن

طيب ديه الاسباب الرئيسيه ايه بقى الاسباب الثانوية
نقدر برضوا نلخصها فى الاتى
1:بدء تلف المساعدين
2:تلف اجزاء فى العفشة (بطاحات او سوست او او او)
3:المشى بسرعه كبيرة فى المطبات وعدم تخطيها ببطىء (حتى لو المساعدين عندك تمام)
4:المشى بسرعه كبيرة فى الشوارع الغير ممهدة(حتى لو المساعدين عندك تمام)

وكمان نقدر نقول ان التعرض لمطب فجائى بسرعه كبيرة قادر انه يفتح العلب بس طبعا لو العربيه نضيفه نضيفه مش من اول مطب يعنى بس عموما كل الفيات 128 لو متعملهاش تقويات هيحصل فيها كدا

وانا هعرض لكم بعض الاماكن اللى ممكن يظهر فيها الشروخات ديه وازاى نعالجها

الصورة الاولى

وده شرخ عند القله زى ما هو باين فى الصورة ولو تم اهماله هينزل على فردة الشاسيه ويقطمها



وطبعا حلها انك تروح للسمكرى ويلحم الشرخ ده ويلحقه قبل ما يكبر

وديه صورة تانية لنفس الشرخ



وزى ما قولت لازم تلحقها بسرعه عند السمكرى

والمشكلة اللى فى الصورة الجاية ديه هى ديه اللى بسببها لو خدت مطب جامد تلاقى العربيه مبقتش تمشى من مكانها
لان العلبة ديه بتروح طالعه من مكانها خالص وبالتالى العجله بتقلب منك والكوبلن بيطلع من مكانوا



شايفين الشرخ فين

وحلها طبعا انك بتروح للسمكرى وبيطقطق المعجون اللى على الحته ديه وبيجيب زرجينة زى ما هوريكم الصور الجاية
وبيرجع العلبة لمكانها ويبداء يلحم تانى الشرخ وبالتالى اول ما يشيل الزرجينه خلاص العلبة بتفضل على مكانها وبتبقى على مقاسات الفبريكه تانى بس لو المساعدين كانت بايظه وانت سايبها زى ما هى يبقى ولا كانك عملت حاجه وهتتفتح منك تانى

وهنا فى الصورة ديه اثناء تركيب الزرجينة علشان نرجع العلبة لمكانها تانى علشان نبداء نلحم الشرخ اللى ظهر فيها



وفى الصورة الجاية ديه
هى ديه الزرجينة اللى بنقول عليها وبتتحط بين العلبتين زى ما احنا شايفين وبيتم لفها من النص وبالتالى الزرجينه بتتفرد زى ما احنا شايفين فى الصورة وبترجع العلبتين لمكانهم الصحيح مره اخرى



وفى الصورة الجاية ديه هنوضح كذا مكان تانى ممكن يظهر فيه شروخات وهيكون كل حاجه برقمها


1:هو ظهور شرخ فى فردة الشاسيه من الامام
2:ظهور شرخ فى فردة الشاسيه من عند القله الكلام ده لو احنا اهملنا الشرخ اللى بيظهر فى القله زى ما وريته لكم فى اول الموضوع

3:الشرخ اللى بيظهر فى القله وده طبعا لما بنهمله بيبقى له عواقب وخيمة

وديه صورة كمان
بيتوضح فيها بعض الاماكن الاخرى اللى بيظهر فيهم شروخ
والصورة ديه فقط منقوله لتعم الفائده كامله



وطبعا ممكن يظهر شروخ فى القوايم الاماميه عند التقاء القايم مع الرفرف وايضا يجب الذهاب للسمكرى للحام الشرخ

طيب دلوقت عرفنا اغلب الشروخات اللى ممكن تحصل فى العربيه بس معرفناش ايه اعرضها او ايه اللى بيظهر فى العربيه لما بيبقى فيها شروخ
الاعراض كالتالى
1:طقطه فى الطلوع او الوقوف (يعنى فى اول الطلعه تسمع صوت طقه وفى او الفرمله تسمع صوت طقه)
2:طقطقه فى تضاريس الشوارع المكسرة (ديه هتسمعها طول ما انت ماشى فى شوارع مكسرة او كل ما تاخد مطب)
3:انحراف وعدم التحكم الكامل فى القياده على السرعات العالية(هتلاقى العربيه على السرعات العالية بداية من سرعة 80 لو جيت تاخد غرزه تلاقى مفيش استجابه جامده من العربيه وانت بتحود الدركسيون او تلاقى العربيه بتحدف منك )
4:وديه بقى فى اسواء الحالات ان العربيه متمشيش خالص وديه بتحصل لو خدت مطب جامد بالعربيه وراح العلبة فصلت من جسم العربيه خالص والعجل قلب والكوبلن طلع من مكانه وطبعا بيبقى ليها عواقب كارثية على لو ده حصل على سرعات عالية
علشان كدا بنقول لازم عمل الشروخ اول باول على طول

طيب سؤال ممكن يسأله اى حد هل لما اجى اشترى عربيه 128
ولقيت فيها شروخ او كان فيها شروخ واتعملت هل ده يعيبها؟

هو لو الشروخ كانت جامده جامده يعنى مثالا ادى ذلك لكسر فردة الشاسيه مثالا فده يعيب العربيه لانه كده فردة الشاسيه اتغيرت واتعمل شغل جامد

بس لو شروخ فى القله او شروخ حصلت فى العلب واتلحقت على طول قبل ما العلب تفتح وتطلع من مكانها او الشروخ على طول بيتم معالجتها اول باول بس مكيونش بسبب الشرخ رش جوه لان الرش جوه معناه ان الشرخ كان كبير بس مثالا مكان شروخ العلب ده بين العلبة والرفرف فلازم طبعا يطقطق المعجون ويلحم الشرخ ويحط معجون جديد فى الحته ديه

وبمعنى اخر ان ال 128 عموما لو فى الحوضو شروخ او كدا فده لا يعيب العربيه نهائيا لان ده الطبيعى ولو مظهرش شروخ فى العربيه اعرف ان العربيه ديه ملعوب فيها ومعمولها تقويات وكدا
ههههههههههههههههه تخيلوا بقه
يعنى الطبيعى بتاعها حكاية الشروخ

ويعتبر من المستحيلات انك تلاقى عربيه 128 مالهاش سجل حافل بالشروخ السابقه واللحامات
فالافضل لك تلحق الشروخ اول باول ومتعملش تقويات للعربيه لان التقويات هى اللى هتنزل جامد جدا فى سعر العربيه مش الشروخ

وانتهى بفضل الله

واتمنى ده ميكونش اخر موضوع ليا مع ال 128 لانى لسه بايعها النهارده وبعد كدا للاسف مش هيبقى ليا مشاكل معاها بس اكيد لو جه فى بالى موضوع جامد عن اى حاجه فيها اكيد هكتبة اول باول باول

وطبعا اى اسئله او كده انا تحت امر الجميع ان شاء الله فى الاسئله باذن الله



و
كل عام وانتم بخير

و

السلام عليكم ورحمة الله وبركاته

ملحوظه: الموضوع حصرى لمصر موتورز فقط ويجوز نقله لاى منتدى اخر ولكن بشرط ذكر مكان الموضوع الاصلى
وانك تدعيلى عن ظهر قلب ربنا يهدينى ويغفر لى ولوالداى وللمسلمين والمؤمنين الاحياء منهم والاموات