[maka]

بسم الله الرحمن الرحيم

توكلت على الله انا و احد الاصدقاء و اتفقنا مبدئيا على مشروع لصيانة السيارات و عملت دراسة مبسطة فى شكل نقط هعرضها هنا للمناقشة على المنتدى كمنتدى متخصص و فى انتظار ارائكم و اقتراحاتكم او خبرتكم ان وجدت + مساعدتكم فى بعض النقط و دعواتكم بالتوفيق

و الهدف من المشروع صيانة السيارات باسعار مخفضة عن اسعار السوق و بنفس الكفاءة او اعلى باذن الله

1- الشغل :

هيبقى شغل سيرفس و صيانات زى ( 10 ... 40 ...100 .. ) كم و يشمل تغيرات سيور كاتينة و اى سيور , فلاتر , بوجيهات , تيل و طنابير , طلمبة بنزين مياه , تغيير زيوت , تربيط عفشة , اسكانر و كشف اعطال و خلافة من هذه الاعمال


2- اسعار المصنعيات :

هتبقى نص التمن او ثلثيه من اسعار السوق و بالمقارنة بالتوكيلات هتبقى حاجة بسيطة جدا يعنى مثلا الاغلب بيعمل الاسكانر ب 40 فاحنا باذن الله هنعمله ب 20 و لو العربية فيها شغل او جيا تبع عرض تخفيضى مثلا هيبقى 15 او 10 و باقى الاسعار هتبقى بالمثل باذن الله و طبعا اسعار التوكيلات بتبقى نار فاللى بره الضمان و يحب يوفر يجيب القطع الاصلية و التركيب يبقى علينا و بما اننا الحمد لله مهندسان فهيبقى سهل علينا قراءة اى مانيوال و الاخذ فى الاعتبار بعض النقط المهمة اللى بيغفل عنها الصنايعية زى ثغرة البوجيهات و العربية بتاخد قد ايه زيت و هكذا من النقط دى


3- الفئة المستهدفة من السيارات : السيارات الكورى و اليابانى موديلات ( 99 - 2011 ) + مشروع التاكسى الجديد


4- العدد و الادوات و الاجهزة :

دى النقطة التانية فى الاهمية و هتاخد تقريبا 3/ 4 الميزانية المحطوطة و ارجو انكم تساعدونى فيها زى حصر العدد اللى هنحتاجها من مفاتيح بلدى و مشرشر و بيب و مفكات و الن كيهات و بنس و طبعا هجيبهم من التوفيقية

+ انى عاوز اعرف منين اجيب جهاز اسكانر بنسخة سوفت حديثة و متوسط اسعاره + و نفس الكلام لكباس هواء صغير و كوريكان كبار و استاندات و مكبس لدورة تبريد المياة و مكنة شفط زيوت

و لو فيه حاجة تانية ناقصة فى العدد ياريت تفكرونى بيها


5- الصنايعية و اجرهم : و دى النقطة الاول فى الاهمية

فى الاول هنحتاج صنايعى على الاقل و اكيد يكون امين و ثقة و يراعى ربنا فى الناس مش لسه هيتعلم او يكروت الشغل , احنا مش هنسيب له المكان و معظم الشغل الحمد لله اعرف اعمله بايدى لكن ممكن احتاجه يجيب حاجة او شغلانة بتحتاج اكتر من ايد او باذن الله لما ربنا يكرمنا و يبقى فيه كذا شغل مفتوح مع بعضه

لكن المشكلة انى معرفش حد او اللى اعرفهم مرتاحين فى ورشهم و كمان اللى هجيبه هديله يومية كام و احددها بايه
فلو حد يعرف حد فى نطاق الجيزة و خالى شغل او عاوز يغير ورشته و يكون امين فياريت يعرفنى بيه


6- العلاقات و العروض و الدعاية :

العلاقات باذن الله مفيش مشكلة فيها , اما العروض فبفكر اعمل عروض تخفيضية يعنى مثلا عربية عملت 3 صيانات فى الرابعة اديها تخفيض معين او خدمة مجانية معين و كذلك الحال لو ناس جايه من مكان معين شركة او موقع نت ...

الدعاية هنعمل باذن الله دعاية ورقية توزعية و دعاية على النت و المواقع و دعاية بين الاصدقاء و طبعا عند الاقتراب من تنفيذه على ارض الواقع باذن الله و لو فيه اى شكل من اشكال الدعاية ناقص فياريت تفكرونى بيه و طبعا توفيق ربنا اولا و اخيرا اهم من اى دعاية


7- اراء و اقتراحات :

لو فيه اى اراء او اقتراحات على الدراسة السابقة ياريت تعرضوعها و نناقشها و عاوز اعرف برده ايه المشاكل اللى بتضايق العملاء و ممكن نتجنبها و نتلافها و النقطتين 4 و 5 المعدات و الصنايعية اللى يقدر يفدنى و يساعدنى فيهم يبقى له جزيل الشكر


و اخيرا دعواتكم الصادقة بالتوفيق و تسيير الحال لان احدنا حاليا خاطب و متوقف تماما عن العمل و الاخر منى عينه يسيب شغله لاسباب كتيرة منها شبه الحرمانية و التعامل الفظ

و الله المستعان