رد: قطع غيار JAC B15
السلام عليكم
عاملين إيه ؟ بقالي فترة كبيرة مكتبتش حاجة بس أنا متابع كل الموضوعات المكتوبة باهتمام و معجب جداً بفكرة الموضوع ده.
وأحب أشارك معاكم بتجربتي مع قطع الغيار - لأني عملت شغلتين في العربية النهاردة
أنا النهارده غيرت البطاحة وهي الجزء اللي بيبقى أعلى المساعد بيبقى شكلها عامل زي المثلث كده وراكبة في العربية بثلاث مسامير- المهم هي بيبقى جواها رولمان بلي علشان المساعد و هو بيلف يمين و شمال
كنت رزعت مطب جامد و بعدها بقيت بسمع صوت غريب و عالي من الناحية اليمين قدام و الحمد لله طلع الموضوع ان البلي اللي جوا البطاحة دي كان فرط أو بمعنى تاني البلية باظت غيرت البطاحة بواحدة بتاعة لانسر تمنها 125 جنية والحمد لله ركبت تمام و الصوت راح
و الشغلانة التانية بقى أحب أشكر الدكتور كمال الأول لأنها كانت في طلمبة البنزين وأنا عملت بنصيحته و غيرت القلب ببتاع الطلمبة الصيني بتاعة الالنترا ودي جبتها بـ 90 جنيه والحمد لله
أما بقى ليه أنا عملت الشغل ده بره التوكيل - ده لأني وانا في التوكيل قلت لهم على الصوت بتاع الناحية اليمين و قعدت أوصيهم لأني خايف أمشي بالعربية من الصوت ده خرجوا بعد فترة و قالوا لي مفيهاش أي حاجة و انهم ربطوا العفشة بس منهم لله بعد ما روحت عند البيت لقيت الصوت زي ماهو فقررت اني مش هاروح لهم في حاجة تاني
|