رد: حكايتى مع السيارات-حكايه 10 سنوات
-20-
فوجئت بان صديقى (ح) قد أشترى سيارة وهو يتصل بى تلفونيا ويقول:
-بارك لى على العربيه الجديده
-ياراجل00ألف مبروك
-أشتريتها النهارده الصبح
-ماركتها ايه
-دايتسون ميرا
-مين؟
قال:
--داهسون
-ايه؟ودى هندى ولا ايه؟
آه قصدك دايهاتسو
-ايوة هيه دى
-ومين مكيرا دى
-يابنى ميرا
-أول مرة اسمع عنها انا اعرف شاريد لكن ميرا دى 00لا
-عربيه هتشباك بس حلوة
-على البركه حلوة من اسمها
جبتها بكام
-اسكت بتاعت دكتور فى شارعنا بس ايه لقطة
-هو مين اللى لقطة العربية ولا الراجل؟
-ههههه00 الاتنين ضحكت عليه وخدتها ب21 ألف
-تشرب 00قصدى تسلم طول عمرك شاطر
وفى الليل ذهبت لرؤيه الميرا كانت سيارة صغيرة هاتشباك جميله من الخارج والداخل معقول00
سيارة 3 سلندر موتور صغير بس يابانى
كان لونها أحمر دم غزال ومجنطه ومروشه00شكلها ظريف!
وعندما طلبت ركوبها كانت المفاجآت00
طلعة العربيه زفت وبترعش مع دبرياج جاب لى شد عضلى 00طارة احسست بانها معوجه ومتركبه بطريقه خاطئه وكل نقله عذاب وكأنك تحارب والافضل فى مثل هذه السيارة النقل بالرجل حفاظا على عضلات الساعد من الشد أو التمزق!
والفرامل بتقول بعد فترة وبتكلبش بعد ما بتفوت وممكن تلاقى نفسك لابس فى الزجاج الامامى بعد م الطاره تطبق صدرك
أما ظهر المقاعد فتلاقى حاجه طالعه فى منتصف الظهر وكأنها ولا مؤاخذه! تنزل من السيارة تضع يدك على ظهرك الذى انقسم!
وعندما فتحت بها على الرابع شعرت بان كل شىء فى السيارة كأنه مستقل بذاته00والسيارة بترقص عشرة بلدى على الطريق! وعندما ذهقت ركنت السيارة وشديت فرامل اليد كانت ح تطلع فى ايدى! فرامل زى الهوا00اظاهر انها بتقف بفرمله رجل فى الارض!
المهم شعرت بانى لتوى خارج من حرب قيادة جرار زراعى رومانى قديم والعياذ بالله
قلت:
-ايه يابنى المصيبه دى؟
-ياراجل دى موديل 90 صاحبها مهمل فيها شويه لكن ح اوضبها وبكرة تشوف 00دى رهوان فى الجرى
-انت وريتها لميكانيكى؟
-لا
-نوديها بكرة للميكانيكى بتاعى يشوفها عايزه ايه
-ماشى
-اقولك ماترجعها أحسن ونشوف لك حاجه أحسن
-لا 00عاجبانى وانا حبيتها
-حبيتها من اول نظرة00يابختها بيك يا حبيب00بكرة تطلعه على عينك
وقد كان
(تتبع)
__________________
|