ترددت كثيرا قبل قرار السفر من القاهرة الى مرسى مطروح بسيارتي لانوس 1 و ذلك لقضاء اجازة العيد .. كل سنه و جميع الأعضاء بخير وسلام .. و الحقيقة سألت في المنتدي من خلال موضوع زميل لنا عن فكرة السفر لمطروح بالسيارة .. و الحقيقة كانت النتائج مشجعة تماما ..
و اخدت قرار السفر .. و انطلفت بسيارتي الساعة 12 بليل يوم الخميس قبل الوقفة .. فولت التانك و صفرت العداد و كشف على كل شيئ و اتكلت على الله .. تناولت سحوري في الرست على الطريق الصحراوي .. و تعرفت على شابين بسيارة هوندا سيفيك و عرفت منهم انهم طالعين على مطروح و الساعة الثانية تماما غادرنا الرست و الطريق طبعا مقولكمش حدوته زي الفل .. و بدون انارة لكن عين القط على طول طريق العلمين و حتى مارينا .. المهم دخلت بنزينه فولت تاني و كلمت باقي الطريق حتى الضبعة بدون توقف و كانت السرعة بسيارتي ما بين 120 و 140 كيلو متر / ساعة .. و كما نبهني احد الزملاء الأعضاء بوجود ترقيع للأسفلت لمسافة لا تقل عن 20 كيلو متر من الضبعة .. فكنت حذر نوعا ما .. و في نهاية الضبعة و قبل مزلقان القطار بحوالي 8 كيلو .. توجد اصلاحات للطريق .. و اسلفت لم يستكمل .. حارة اسفلت وحارة مفرود بها الحصي و بدون اسلفت .. و طبعا بدون علامات ارشادية و ظلام دامس و السرعة عالية .. خففت من سرعتي و انتقلت للجزء اللي تم سفلته .. و اخونا بتاع السيارة الهوندا كان اختفى من خلفي تماما قبل هذة النقطة .. المهم توقفت للآطمئنان عليهم .. للأسف مفيش حس و لا خبر .. المهم رجعت تاني شوية لقيت العربية اتقلبت بيهم بسبب المستويين في الأسفلت لكن الحمد لله كانت اصابتهم خفيفة و جت الأسعاف و نقلتهم لنقطة اسعاف او مستشفى لا أعلم .. كملت طريق تاني ووصلت مطروح الخامسة و النصف صباحا .. و حمدت ربنا اننا بخير ..
لكن ما اسعدني انني للمرة الأولي اسوق لمسافات طويلة و بسرعات عالية و في الليل و الضلمة .. و دى كان اختبار لي .. و تاني حاجة ان اللانوس 1 على عكس ما يشاع انها بعد 120 بتعوم و بتفقد ثباتها على الطريق .. ودا عن تجربة غير حقيقي لاني على فترات وصلت سرعتي 150 الي 160 كيلو .. و الثبات كان تمام برغم الحمولة .. و ما اسعدني ايضا انه كان لا يفوقها على الطريق في العودة نهارا سوى المرسيدس و البي أم دبليو ..
الحاجة اللي كانت قلقاني حكاية البنزين .. و خايف من عدم توافره في مطروح .. لكن الحمد كانت البنزين يوميا في المحطات من الساعة 11 مساءا و حتى السابعة صباحا بعد كدا ماتلاقيش خالص ..
استهلاك البنزين داخل مطروح خلال اسبوع يعني 180 كيلو اخد نصف التانك تقريبا ..
المسافة من عين شمس بالقاهرة لمرسى مطروح 490 كيلو و نفس العداد في العودة تقريبا ..
بالنسبة لاستهلاك البنزين خلال السفر .. التانك 45 لتر يكفي للذهاب و 45 لتر تكفي للعودة .. يعني تفويلة .. تودي السفرية .. لكن لا تعتمد على كدا .. خلينا في الأمان أحسن و نفول على الطريق أذا امكن ..
دا كان تقريري عن السفر بالسيارة لمرسى مطروح و العودة .. و كل عام و انتم بخير
اسف للآطالة .. لكن قلت اعرف الزملاء للآستفادة من بعض التفاصيل ..