شرح : كيف يعمل ماتور اللانوس ( مبسط / مصور ) جزء 1 : ecm – cps - tps
انا احترت اكتب الموضوع ازاى و قررت انى اكتبه بابسط طريقة و الاسئلة و المشاركات البنائة هى اللى حتكمله
لانى كنت ممكن ببساطة اترجم الشرح اللى عندى فى كتاب الصيانة بس حيبقى دمه تقيل و صعب
السر فى : الـ ECM اللى بيسموها الكنترول – او الكومبيوتر و هى اختصارهاelectronic control module
و وحدة ال ecm هى اللى بتنظم عمل الماتور( عشان يستجيب لمطالب و ظروف القيادة المختلفة ) من خلال حساسات بتنقل لها بيانات
و بنائا على البيانات دى بتتحكم فى الماتور من خلال اعطاء اشارات تشغيل لاجزاء زى الرشاشات و الكويل و حاجات تانية
الكويل
الرشاشات
ال ecm مكانها تحت الكرسى اللى قدام يمين طبعا واصلها ضفيرة مجمعة اشارات الحساسات المختلفة و طالع منها ضفيرة لتوصيل إشارات التحكم المختلفة و راكب فيها فيشة الاوكتان
مهم ان ال ecm تعرف وضع عامود الكرنك بالتالى حتعرف وضع البساتم و تقدر تاخد قرار توقيت الاشعال و توقيت فتح الرشاشات
عشان كده فى حساس الكرنك cps و ده راكب تحت من ناحية الدينامو بس تحت و عبارة عن لاقط مغناطيسى و متركب على مسافة قريبة من طنبورة مسننة راكبة على الكرنك
و ده مكانه هنا تلاقيه من تحت الدينامو صعب كنت اصوره
مكان حساس الكرنك cps
و دى اوضح صورة عرفت اصورها ليه
حساس الكرنك cps
الطنبورة مسننة 58 سنة 57 سنة زى بعض بمسافة خطوة ما بين كل واحدة والتانية 6 درجات و السنة ال 58 عريضة عرض ال 18 درجة اللى باقين على ال 360 بتوع الدايرة الكاملة
و الحساس قريب منهم جدا 1.3 مليمتر فلما السنان بتعدى من قدام الحساس بتقطع الفيض المغناطيسى بتاعه و تخليه يولد اشارات متقطعة كقوة دافعة كهربية بتروح لل ecm و طبعا لما السنة العريضة حتعدى من قدامه حتولد اقوى اشارة ساعتها الكنترول ecm حيعرف وضع الكرنك بالبساتم بالصمامات
و يقدر بناءا على اشارة حساس وضع الكرنك انه يدى الاشارة المناسبة لعمل الكويل ( ملف الاشعال ) عشان توقيت اشعال البوجيهات المناسب + اشارة للرشاشات عشان توقيت شغلها
احنا اتكلمنا عن توقيت عمل الرشاشات
اما بقى كمية البنزين فدى بتتحدد من خلال اطالة او تقصير زمن فتح الرشاش on – time من خلال الـ ecm
و عشان الـ ecm تاخد القرار الصحيح بتعتمد على شوية حساسات
اشهر واحد و مفهوم و باين تأثيره لانه هو اللى بيستجيب لمطالب السواق driver demand هو ال tps حساس وضع البوابة
و ده راكب على الجهة المقابلة للبكرة و الواير على نفس الأكس
دى صورة البكرة و الواير اللى بيحركوا البوابة مع دوسة البنزين
طبعا مع دوسة البنزين فالاكس حيلف و زاوية فتح البوابة حتتغير
الـ tps راكب على الاكس من الناحية التانية
و زى ما واضح ان جسم ال tps متثبت فى البوابة و الاكس بيلف جواه مع الدوس على دواسة البنزين فهو ببساطة بوتونشيوميتر ( مقاومة متغيرة ) واصل له سلك طرف ارضى و طرف باور 5 فولت الطرفين من ال ecm
فلما زاوية البوابة تتغير من الوضع المغلق لغاية الوضع المفتوح بالكامل الـ WOT wide-open throttle فاشارة الفولت اللى خارجة منه بتتغير من 0.5 فولت لـ 5 فولت
و بكده الـ ecm تعرف السواق عايز إيه
انا حاسس ان الموضوع حيطول عشان كده حيبقى اجزاء بإذن الله نكمل فى الجزء التانى قريبا ان شاء الله
للرجوع لمزيد من التفاصيل عن الحساسات يمكن الاطلاع على شرح الاستاذ سمير عياد
ارحب بالاعضاء الخبراء اللى انا شخصيا بستفيد و بتعلم منهم : سمير عياد – عصام غنايم -mr astra - شريف فريش – the best – sharoo و كتيير غيرهم الحمد لله المنتدى مليان
__________________
سبحانك لا علم لنا الا ما علمتنا
|