18-10-2012, 11:06 AM
|
 |
من انا؟: الفقير إلى الله
هواياتي: جميع الأعمال اليدوية-IT
|
|
تاريخ التسجيل: Dec 2011
الموقع: مكـــــــ عين شمس-م.نصر-التجمع الأول ــــــانى
المشاركات: 5,061
|
|
مدونتى .............عن الفتيس الاوتوماتيك
الموضوع بتوفيق من الله سبحانه وتعالى وانا عارف انه متواضع جدا لكن بإذن الله هحاول أجيب معلومات أكتر وياريت اى حد يضيف وينقح الموضوع
الموضوع مفتوح ومتجدد
وياريت كلنا نشارك
ده مضمون الرد على رسالة لأحد زملائنا بيستفسر عن الفتيس الاوتوماتيك 
معلش اعذرنى او ماكنتش شرحت فى المشاركة أسباب بوظان الفتيس او تقصير عمره
لكن هدى لحضرتك نبذة مختصرة عن مكوناته من جوا
طبعا بيبدأ من الموتور متوصل بيه عن طريق عمود كبير ماشى فى نص الفتيس بالظبط
بعد كده من جوا الفتيس هتلاقى حلة مدورة ومليانة ريش من جوا بيقولوا علسها طرنبة زيت ودى مسئولة عن ضخ الزيت فى الفتيس وهى روح الفتيس
وبعدين فيه اتنين كلاتش (يعنى حاجة زى الدبرياج كده ) بس طبعا بطريقة مختلفة عن الدبرياج العادى
واحد منهم مسئول عن تحريك العربية للأمام
والتانى للخلف
لكن خلى بالك بيبقوا من جوا مليانين تروس ومعقدين اوى فى الفك ( مش مشكلتنا )
نيجى بقى للفتيس من تحت وده أهم جزء وهو عبارة عن حاجة اسمها Valve Body وده عبارة عن علبة مليانة مجارى زيت رفيعة جدا جدا ومليانة صمامات عشان تغذى الفتيس والكلاتشات وتبديل الغيارات بسرعة وسلاسة
بيتهيألى كده الصورة وضحت
كلاتشات مليانة تروس لازم يكون الزيت حالته ممتازة ومانمشيش عليه أكتر من عمره
الصمامات كمان لازم نعمل حسابنا انها لها عمر إفتراضى وده بيطول اكتر لو غيرنا الزيت فى ميعاده كمان ماننساش مع تغيير الزيت لازم نغير الفلتر وننضف كرتيرة الزيت
فى واحد زميلنا هنا من المنتدى نصحنى بحاجة بالنسبة للفتيس الأوتوماتيك عشان نحافظ عليه اكتر لكن الصراحة مش هقدر أقولك عليها غير لما أجربها بنفسى وماتفهمنيش غلط لأنى عمرى مابقول على حاجة غير لما بكون جربتها بنفسى
طبعا بقى هنيجى للنصايح العامة ودى من وجهة نظرى
الكيك داون بيزود من معدل حرق زيت الفتيس بسرعة
ده غير انه بيحمل على الصمامات أكتر
عدم تنظيف وتغيير الفلتر بيزود معدل التآكل وكمان استخدام زيت مخالف لكاتالوج العربية (وده هتلاقيه مكتوب كمان تحت الكبوت)
ونتا فى الإشارات والزحمة تحرك دراع الفتيس على الN
لما تكون العربية هتقف أكتر من 10 ثوانى
هى كلها تكه دراع لكن هتحافظ على الفتيس
لمعلومات أكتر عن الفتيس الاوتوماتيك
من جوجل http://en.wikipedia.org/wiki/Automatic_transmission
من الشمال هتلاقى حاجة اسمها محول العزم torque converter
بعد كده ونتا رايح ناحية اليمين هتلاقى طرنبة الزيت وبعدين كلاتش الامامى وبعدين الكلاتش الخلفى
من تحتهم بالظبط هتلاقى الvalve Body وبعدين الفلتر وكرتيرة الزيت
وفى بعض العربيات لازم تفك الكرتيرة وتنظفها من الرواسب وتغير الفلتر مهمممم
وده الـValve Body اللى بقولك عليه مليان صمامات ضيقة من جوا
ده نوع بسيط
وده الكلاتش من جوا تخيل مليان تروس أد اه من جوا
بعد كده عمود توصيل الحركة للعجلات
اتمنى أكود أفدتك فى موضوع الفتيس
تحياتى وإحترامى
|