[حسام البورسعيدى]

معلش يا غالى لانى لسه ملاحظ موضوعك ده حالا ...

اولا الحمد لله والف مبروك انك عرفت تصلح الكرونة وعموما بعد كده لو اضطريت تغيرها بلاش تجيب غير الكرونة بتاعتها (التروس تكون نفس المقاس سواء التاج او البنيون) علشان متحسش بفرق فى العزم والسرعة ....

بالنسبة لموضوع العمره المصنعية كده كتير قوى لو طقم شنبر بس ..

مصنعية تغيير طقم الشنبر (نص عمره) من 250 الى 300 جنية بالكتير قوى (تبقى انك كده كارم الراجل) .. لكن 400 جنية كتير ...

وانا عن نفسى قبل كده من حوالى سنة ونصف عملت نصف عمره شاملة (فك تفوير وش السلندر وتغيير الكستبانات (التاكيهات فى مواتير DOHC) ورودية وحل البساتم وتغييرها وتركيب طقم شنبر وايضا تغيير الكبالن وتشييك على الفرامل) كل ده بمصنعية 275 جنية وكنت كارمه كمان علشان ركبلى الكبالن وهى المفروض شغل العفشجى ...

لكن 400 جنية كتير قوى يا نجم لان على الاقل عربيتك فيات قديمة والمفروض ان شغلها سهل وغير معقد ... يعنى بالكتير اوى 300 جنية لو نص عمره من غير حل البلوك ونزود 50 جنية بالكتير اوى لو حصل فك للبلوك وخرط شمايز وكده (باذن الله مش هتحتاج خرط) ...


عموما انا هحاول اقولك على الخطوات بتاعت النصف عمره علشان تبقى فاهم ايه اللى بيحصل ..

عموما اوعى تسيب عربيتك عند الميكانيكى وتمشى لأى سبب .. خلى كل حاجة قدام عينك ...

- باذن الله اول ما هتروح للميكانيكى حاول تروح بدرى اول ما يفتح وتسيب العربية تبرد ..

- هيبدأ اول حاجة يحل وش السلندر كله وسير الكاتينة والذى منه ...

- بعد ما هيحل الوش ويطلعه بره هتبدأ تشوف البلوك (الجزء التحتانى من الموتور) والبساتم ..

- هيبدأ الميكانيكى ينزل تحت العربية ويحل السبايك والبساتم ويطلعها بره الموتور ..

- لازم تطمئن على حالة البساتم انها سليمة ومش مكسوره (لا قدر الله) ...

-وبعدين اطمئن على الشمايز (جدران غرف الاحتراق او اماكن البساتم) انها ناعمة ومفيهاش خدوش او تجريح .. ولو فيها تجريح كتير (لا قدر الله) يبقى لازم تاخد وش فى المخرطة للاسف (وده هيقلل عزم الموتور بعد كده) ...

- لو البساتم والشمايز تمام هيبدأ يغسل جسم الموتور كويس ويركب الشنابر فى البساتم ويبدأ يركب البساتم فى المكنة باستخدام اداه عباره عن اسطوانة حديد او صفيح كده فيها شداد بتضغط الشنبر فى البستم علشان يدخل فى مكانه فى الموتور ... وبعد ما يدخل البساتم الاربعة هينزل تحت يقفلهم فى الكرنك ويقفل كل حاجة من تحت ...

وعندها تبدأتطمئن شوية ان الصعب خلص ...

- هنيجى بقى للوش .. هيعمل رودية ويظبط (حسب اللى هو شايفة) ويشيك على التاكيهات والكامات والذى منه ...

وبعدين هيبدأ يركب الوش .. يحط جوان وش السلندر (سواء واحد او دبل) ويركب الوش ويبدأ يربط المسامير خلف خلاف على شكل X .. يعنى يبدأ يربط من النص وبعدين الاطراف .. ويا سلام لو يستخدم مفتاح عزم فى ربط الوش علشان التقريط يبقى مظبوط ...

هيبدأ يقفل كل حاجة ناقصة فى المكنة وبسم الله الرحمن الرحيم يدور العربية ويحط الزيت الجديد ...

لو العربية دايره كويس يستحسن تفضل دايره 3 او 4 ساعات وهى واقفة علشان تلين قبل ما تمشى بيها ...

وبعد ما تمشى بيها ابدأ امشى بالراحة لانك هتكون فى مرحلة تليين زى العربيات الجديدة بالظبط بس لمسافة 300 كيلو مثلا حاول متعديش 2500 RPM مثلا وبعدين واحده واحده ابدأ اقرص اكتر ..

ومبروك مقدما يا باشا ....

طبعا هتلاقى حاجات بتنطلك اثناء التصليح مكنتش ع البال ولا ع الخاطر ده شئ اكيد ...

عموما انا متابع معاك باذن الله لغاية ما تعمل العمره على خير باذن الله ....