تحويل شيري ايه 11 إلى سيارة خطوة بخطوة
تحويل شيري ايه 11 إلى سيارة خطوة بخطوة
كانت البداية لما اشتريت العربية اللي اسمها شيري ايه 11
بصراحة اشتريتها لان ما كانش فيه عربية سيدان مكيفة واتوماتيك بالسعر ده وانا بصراحة ما كانش معايا أكتر من تمنها يعني ما كانش ينفع أجيب حاجة أحسن منها
المهم
في الأول كان الموتور دايما بيرتعش وموال تنضيف حساسات وتغيير حساسات بدون فائدة وواحد في المنتدي عامل نفسه خبير كلمني وقاللي دا من عمود الكامة حدبة اصغر من التانية بمقدار ورقة واقسم بالله إنه هيمسح كل مشاراكاته وهيدفع التكاليف لو طلع كلامه غلط ومشيت وراه وتغيير عمود كامة وبلوف وبدون فايدة والآخر الكنترول باظ والشيخ طه اللي في الحرفيين رحتله معايا 1950 جنيه أشتري كنترول مستعمل أصر على 2000 جنيه
طب يا عم الحاج انا جاي من المنصورة وحرام أرجع علشان 50 جنيه ---- مفيش فايدة
رجعتله تاني بقى الكنترول ب 2500 وبرده ما كنتش عامل حسابي ورحت تالت مرة عامل حسابي انه هيقول 3000 ( 3000 جنيه في كنترول عربية صيني وكمان مش جديد ---- هعمل إيه العربية واقفة) المهم لقيته قاللي ب 4000 ومن غير فصال ولو أخدته للمنصورة ما يرجعش ------ اتخنقت وقولت سيبها مركونة – ورحت أجرت اوبل كورسا لغاية ما أشوف هعمل إيه ------ المهم فجأة قلت طب ليه ما أرجع الموتور لأصله قبل شغل الصين وفعلا مانفولد + كربيراتير + عمة فورد اسكورت 1600 تخيلو بكام 780 جنيه بس واسبيراتير الكتروني بتاع عربية شاهين وعدلته في المخرطة بعمود بيجو 504 واشتغلت العربية وابتديت شغل بقا ----- الرجة اللي في الموتور طلع الفلام فيه شرخ وغيرته بواحد جديد 350 جنيه وركبت انذار ووحدة رفع وشغلت التكييف على المفتاح لأنه كان شغال على الكنترول ---- لحد الطامة الكبرى النهارده ----- ماشي بالعربية ومعايا الاولاد الاقي العربية كل ما اسيب رجلي من على البنزين تبطل لحد ما وقف وماردتش تدور وألاقي ياعم الحرارة على الآخر والمياه بتغلي وبتفور والمروحة ما شتغلتش
طيب سبت العربية لما هديت شوية ونزلت شرطتين عن الآخر ورحت مدور وطالع على السريع وماشي 140 وبعدين جبت الفتيس على المور ( n) وسبتها تسحب وتقابل الهوا ---- بردت العربية نزلت أشوف فيه إيه لقيت المروحة مش عايزة تدور
ماشي ---- حتة سلك وتوصيلة مباشرة من البطارية على المروحة ورجعت البيت وسبت العربية لما بردت خالص ونزلت بقي أشوف الحكاية – لقيت سلك من كاتاوت المروحة مفصول ركبته ودورت رجعت المروحة تشتغل وتفصل
وبعدين بقى حكاية المروحة دي ------ كل ما سلك الكتاوت تفصل أو الساعة تبوظ أو تعلق نعطل ونشوف القرف دا كله
المصيبة الاكبر لو الميه فضيت من الرادياتير أو لو الرادياتير مسدود العربية تسخن والمراوح ما بتدورش
طيب أنا بقى هعمل شغل غير بتاع الخواجة اللي عندنا عقدة منه
المهم صممت دايرة الكترونية هتاخد قراية من الحساس بتاع الحرارة اللي في جسم الموتور ويشغل المراوح ( المروحتين ---- المروحة اللي على ساعة الحرارة والمروحة اللي على التكييف) وفيها مفتاح أضبط منه درجة الحرارة اللي انا عايز العربية عليها ( يعني هتثبت درجة حرارة قصوى للسيارة أول ما تتجاوزها المراوح تشتغل ---- وانا اللي هختار درجة الحرارة دي عن طريق المفتاح ------ شغل افتراء بقي ) هثبت درجة الحرارة على 85 وكفاية كدا 85.5 المراوح تشتغل 84.5 المراوح تقف
إيه بقى رايكم في الفكرة دي ( أظن تنفع أوي للأوبل وبالذات الفكترا ----- هتريح كتير من وش الدماغ )
وللحديث بقية
|