[borio1704]

المشاركة الأصلية كتبت بواسطة ahmedraafat00 هوه فعلا واضح ان الحراره عندى مش متظبطه خالص انا النهارده سخنت العربيه 5 دقايق وبعدين سوقتها نص ساعه متصله على سرعات 80-90 ومؤشر الحراراه كان فى اول الربع الأولانى تفتكر حضرتك ده ممكن يسكون سبب لأستهلاك البنزين ؟ انا فى الزحمه بحرق 40 لتر على 80 كيلو دى صوره لمؤشر الحراره بعد مشى نص ساعه على سرعه 80-90

الوضع ده سبب رئيسي لارتفاع استهلاكك البنزين

طيب ليه انخفاض الحرارة بيبقى سبب في زيادة الاستهلاك؟؟؟

أنا أقولك..

أولا.. انخفاض درجة الحرارة بيسبب امتصاص الحرارة من حجرة الاحتراق، وبالتالي بيحصل كذا حاجة:

1- الاشتعال ممكن بيبقى ضعيف .. أو بمعنى أصح .. أحيانا ممكن الشرارة ما تنجحش في إنها تعمل إشعال لكل البنزين اللي دخل.
2- الحرارة اللي بيمتصها جدار السلندر بتأثر على حجم الغاز اللي بيتولد من الانفجار... بمعنى إن الغاز حجمه هيقل نتيجة إنه بقى أبرد... وبالتالي دا بيضعف عزم الموتور.
3- لو غرفة الاحتراق كانت أبرد من اللازم.. ده بيخلي الاحتراق نفسه ما بيتمش بصورة كاملة، وبالتالي ده بيظهر في صورة هباب وسواد بيطلع من الشكمان وتقطيع في أداء الموتور.

طبعا... كل الكلام ده بيخليك تضطر تدوس بنزين زيادة علشان تاخد عزم معقول من الموتور، وبالتالي استهلاك البنزين بيزيد بشكل كبير جدا.


ثانيا.. الخلوصات بتاعت أجزاء الموتور ما بتبقاش مظبوطة ، لإنها محسوبة على أساس درجة حرارة التشغيل والثرموستات موجود، وبالتالي ده كمان ممكن يخلي جزء من الضغط جوه السلندر يهرب للبلوك.. وده كمان معناه عزم أقل...

ده بالإضافة إلى إن الوضع ده ممكن يكون سبب في تآكل زايد لأجزاء الموتور بسبب إن بعض أجزاؤه بقت قافشة أكتر من الطبيعي وأجزاء تانية بقت مبوشه... وده كله بسبب تمدد المعادن مع الحرارة


الطبيعي لما تركب الثرموستات إن تسخين الموتور ما ياخدش أكتر من 3 دقايق.. منهم 30 ثانية بالكتير قبل ما تتحرك بالعربية عشان نضمن إن الزيت وصل لكل أجزاء الموتور قبل ما نبدأ نحمل عليه حمل تحريك العربية.






...