[أشرف الشفقى]

شكراً موت حازم وأحمد على المعلومات المفيده ده وتطمينكم ليه. كده الواحد استريح وحط فى بطنه بطيخة صيفى. الحمد لله.

الله يبارك فيك يا مادا. بإذن الله تكمل الألف وتعمل الصيانة بسلام.

مشكلة تانية بس جامده
فى مشكله تانيه حصلتلى بعد كام يوم بس من شرا العربية. بس المرادى كات مشكلة جامده فعلاً:

بعد ما ركنت موازى للرصيف قدام البيت وقفلت العربية بصيت لقين إنى مش عاد ل العجل كويس، قمت بدل ما أتعب نفسى وأشغل العربية من تانى، رحق حركت الدركسيون بإيدى والعربية مطفيه (يعنى الباور ستيرنج مش كان بيساعدنى). حسيت إن الدركسيون تقيل حبه، وده عادى طبعاً لإن الباور مش شغال. لكن المشكلة إن الدركسيون راح قفش وأنا بحوده يمين وحلف ميت يمين إنه مش يحود يمين أكتر من كده مع إن العجل كان يدوب بيبص قدامه وعينه فى راصه.

انزعجت حبه، بس قلت لنفسى جايز قفشة الدركسيون ده عادى ومقصوده علشان العربية ما تتسرقش فعاملين الدركسيون يقفش لو اتحرك كتير والعربية مش شغالة. لكن الحوار طلع أكبر من كده ...

تانى يوم وأنا بحاول أشغل العربية، المفتاح أصلاً مش دار ولا تكه واحدة! أهو ساعتها بقه انزعجت بجد ومخى كان عمال يودى ويجيب، قلت لازم حاخدها للصيانة وآدى كذا يوم حتفضل مركونه من غير شغل لحد ما أشوف حعملها إيه. مش كنت راضى أدوس على الممفتاح جامد أوى كنت خايف ينكسر جوه وأنا بحاول أدور العربية. فى الآخر رحت دست حبه زياده وبقدرة قادر دار المفتاح والدركسيون طبعاً فى ساعتها لما سدق قال يا فكيك لما الباور اشتغل وقام جرى فى إيدى زى الحلاوة.

رغم إن المشكلة اتحلت دلوقتى والمفتاح دار (وكذا الدركسيون) لكنى قلقان من الموضوع ده وخايف يحصل تانى ومش عارف ليه المفتاح مش كان راضى يدور خالص (بعد لما الدركسيون قفش) غير لما دورت المفتاح بعنف شديد موت (والحمد لله إنه ما اتكسرش).

على فكره أنا دورت على النت ولاقيت حد بالإنجليزى كاتب إنه كان عنده مشكلة فى الباور ستيرنج وإنه قفش منه وهوه سايق وراح الصيانه غيره! هيه الهيونداى i10 فيها مشكلة فى الناحية ده ولا إيه، ما تخضوناش بقه، دى العربيه لسه جديده. رأيكوا إيه فى الحوار ده.