تم بحمد الله بعد عناء طويييييل ومجهود شاق تجديد رخصة السيارة ( رينو لوجان 2012 ) لمدة 3 سنين مع الفحص .. بعد رحلة عذاب استمرت يومين كاملين من أولهم لآخرهم
( بدون دفع ولا مليم رشوة ولله الحمد ) ..
علشان كده قررت أكتب الموضوع ده علشان محدش يحتار حيرتي ,, وأحكي فيها رحلتي مع المرور لتجديد الرخصة والفحص
نبدأ على بركة الله
=-=-=-=-=-=-=-=-=-=-=-=-=
المرور : طوسون أو المنتزه ( الاسكندرية )
المطلوب : تجديد رخصة اللوجان ( 1600 CC ) لمدة 3 سنين مع الفحص
=-=-=-=-=-=-=-=-=-=-=-=-=
-=- الإجراءات بالتفصيل الممل -=-
أووووول حاجة تعملها تروح من بدري جداً .. الساعة 8 أو 8:15 على أقصى تقدير .. وتاخد دورك في طابور الفحص .. وخلينا نبدأ في الإجراءات ..
أولاً : الإجراءات الواجب إنهائها قبل الفحص :
1 - تشتري ملف للعربية لترخيص 3 سنين ( ورق الفحص + الطفاية + الكمبيوتر + بيانات ) وتدفع 35 جنيه
2 - تاخد الطفاية و تخلي مسؤول الطفايات يختملك عليها إنها صالحة { طفايتي كانت فاضية ورحت المطافىء قبلها بيوم مليتها ودفعت 42 جنيه ( 16 بودرة + 15 خرطوشة + 11 صيانة ) }
3 - تاخد الطفاية والمثلث وتروح للكشك المختص بيهم وتاخد وصل بيهم { الأخت طلبت مني أجدد شنطة الإسعاف لمرور 3 سنين عليها ودفعت 45 جنيه }
4 - تروح لمختص البصمة يرفع بصمة الموتور والشاسيه .. وبعدين تسلم ورق الفحص و وصل الطفاية والمثلث وشنطة الإسعاف وتسلمهم للمهندس ,, هيكشف على الشاسيه ويمضي الورق ,, وتخلي الضابط يمضي ويختم .. وكده مبروووووك خلصت الفحص
================
ثانياً : إجراءات تخلصها براحتك قبل أو بعد الفحص :
1 - تروح كشك التصوير ( داخل المرور ) وتطلب منه ملف تجديد 3 سنين + فحص .. هتاخد ملف فيه شوية ورق وتدفع 8 جنيه ( فيه 3 ورقات شبه بعض تملاهم بنفسك )
2 - تروح الشباك الخاص بعربيتك ( على حسب حروف اللوحة ) وتطلب منهم الرقم القديم أو أصل اللوحة ( بالنسبة ليا مفيش رقم قديم علشان عربيتي موديل 2012 وأول لوحات ركبت عليها هي اللوحات الجديدة )
- وبالمرة اطلب منهم تقدير للضريبة ( بالنسبة للوجان الضريبة كانت 631 جنيه للـ 3 سنين )
3 - تاخد الورقة اللي عليها أصل اللوحة وتروح تطلع شهادة مخالفات وتدفع 5 جنيه ( هتستلمها بعد 10 دقائق تقريباً )
4 - تدفع الضريبة ( 631 جنيه ) وتجيب بـ 10 جنيه طابع شرطة ..
5 - تدفع تأمين إجباري من أي شركة تأمين ( 108 للسنة الواحدة ,, و 310 للـ 3 سنين )
6 - تاخد كل الورق اللي فات ( ورق الفحص – إيصالات الطفاية و المثلث والإسعاف – المخالفات – صورة الرخصة والبطاقة – الورق اللي كملته ....... الخ ) وتسلمه على الشباك اللي فيه رقم اللوحة بتاعتك ..
7 - تستلم ورقة الكمبيوتر ,, وتطلع بيها على الشباك ,, وبعد 10 دقايق تستلم رخصتك ..
وألف ألف مليووووووووون مبروووووووووك ... وكفاااااارة يا راجل 