[samehsaeed]

معاك حق في كل كلمة وأنا كنت امبارح في أوتو سمير ريان بطل على الألنترا وتخيل (هو ده رأي الناس برده) اللهم إلا ما رحم ربي لدرجة إنهم بقوا يسيبوا الألنترا 2012 ويروحوا على ألنترا 2011 ب 119000 جنيه هاي لاين خليجي فيها من الأبرة للصاروخ حتى ال GPS وفتحة السقف، ويقولوا بالذمة مش حرام أدفع فلوسي في عربية زي ديه فرق حوالي 40 ألف جنيه بالراحة وفي النهاية مش هاخد المواصفات ديه كلها والألنتر القديمة أصلا الناس كلها بتشكر فيها وماحدش عاب فيها خالص إلا حاجات بسيطة، بصراحة لما شهدوني قولتلهم بصراحة اه عندكم حق ونص، أما الأكسنت RB الطلب عليها بالدور أساسا والألنترا تحسها واقفة زيها زي أي عربية في المكان كأنها عادي يعني و"خليها تنفعك ياعم غبور أشبع بيها وبالفئات بتاعتها"، طب والله كان في كمان واحدة جيتا 2010 هاي لاين ب 172,000 كانت عيني هتطلع عليها وسبت الناس بيتفاوضوا مع الراجل في تمنها وبيطقسوا عنها وتقريبا رسيوا عليها، ومادام كده كده هدفع يبقى أدفع في حاجة تستاهل وقطع الغيار تدبر وربك ما بينساش حد

النقطة بقى هل غبور لعبها صح ؟

بمعنى هل هو عارف كويس إن الأكسنت ما تستاهلش التمن ده وإن الناس هتفضل تشتكي، بس لما تنزل الألنترا بالسعر الوهمي ده بعد أحلام المصريين بيها ليل نها من اللي شافوه وقرأوه عنها على النت يبقى ساعتها ال RB هتبقى فلة شمعة منورة وخاصة مع التشابه الرهيب بين الأتنين وهيبقى اللي كان بيحلم بألنترا وما قدرش على تمنها هيكتفي بهاي لاين RB وزي الفل ويبوس ايده شعر ودقن واللي ربنا كارمه وموسعها عليه هينقسموا لشريحتين شريحة هتجيبها برده لأن شكلها تحفة بصراحة وفي ناس بتفرق معاها الحاجات ديه قوي ، وشريحة تانية هتستخسر فيها الفلوس وتتجة للتيوتا والجيتا والسيفيك والمازدا وكده يعني
على العموم ديه مجرد وجهة نظر بس ربما تكون صح، ربما...........