رد: لعنة عدم ثبات السيارة (يا فرحة ما تمت مع البورا)
طيب بدام شغلتكو معايا, بيقى حقكم ان اقول ما وصلت اليه الأمور,
بعد كتر لف و دوران أفادنى أحد الأخوة الكرام و هو أحد المتخصصين فى مجال VW على ميكانيكى فولكس محترم, فروحتلو و كشف و طلع بالأتى:
1- بارات الدلكسيون الداخلى محتاجة تتغير
2- جلبة المقص اليمين مش متركبة صح (و أنا كنت بحس بدبدبة من الفرامل مكونتش فاهمها لسه و كنت بكدب نفسى) و بالتالى محتاج تغير الجلبتين.
3- كاوتش الميزان محتاج يتغير
4- البطاحات الأمامى
5- المساعدين الخلفى
و بالفعل بدات مهمة البحث و الشراء, فرحت لأشرف الشهابى جبت البطاحات بالبلى بتاعها, الجلب و كاوتش الميزات و الحاجات ديه عملت حسبة 900 ج تقريبا (الفاتورة مش معايا دلوقتى), و بعدين ملقيتش البارات الداخلى و قلى الأصلى ب 1200 ج و مش هتلاقى الأصلى و بدل ماتجيب مضروب يبقى خليك فى الاستيراد.
المهم الراجل المحترم اياه دلنى على واحد استيراد فى الحرفيين (مجدى بيومى) و جبت منه البارات ب300 ج و بعد مالميكانيكى كشف ماعجبتهوش فغيرتهم ب 2 تانيين و عجبو و ابتدى الشغل و خلص على حمد الله و بالمرة جبت جوز مساعدين خلفى استيراد ب 200 ج(دول اتعمل فيهوم واجب)
النتيجة: تحسن فى الثبات و المناورة و جربت على دائرى مدينة نصر و كام غرزة مش بطالين, و انتهاء الدبدبة الأمامية بشكل كبير و اهم نتيجة تحسن شديد فى الفرامل و انتهاء مشكلة الدبدبة المع الفرامل تماما (موضوع الجلبة الكانت متركبة غلط.
طيب فضل عندى غربلة بعد 110 تقريبا, و كمان دبدبة المساعد الخلفى اليمين لسه موجودة شكلو هيطلع مشكلة فى الجنط أو الفردة و عموما أنا مش مرتاح لموضوع المساعدين استيراد و غالبا هرجعهم و أجيب جوز مونرو (قلولى رأيكم فيها لانى على وشك شرائهم ان شاء الله), و مشكلة التنطيط مش قادر أقيمها لأنى مركبتش حد ورا كمان بالضغط على المساعدين الخلفية حسيت بمساعد اليمين أنشف من الشمال.
طيب تشاء الصدف انبارح ان أخد بلاعة بالعجلة الشمال و أنا كنت رايح العبور و بعد ماخلصت مشوارى و طالع أركب العربية لقيت الفردة على الأرض و غيرتها بالاحتياطى (جنط حديد و فردة قديمة شوية مش قد كده) و كانت المفاجأة:
- مفيش غربلة على 120 تماما و طبعا جه فى بالى ان صنايعلى مرة قلى الفردة اليمين فقط ال فيها رنجات لكن الشمال لاء, و قلت فى عقل بالى يبقى أكيد الغربلة كانت من عدم وجود رنج فى الفردة الشمال.(على فكرة الفردة الى خدت البلاعة باظت تماما اتخرمت من الجنب الله يرحمها)
المهم قدر الله و ما شاء فعل و مازعلتش كتير لانى النية مبيتة على تغيير الفرد و ان شاء الله الجنوط كمان لأنهم مش عاجبنى و صنايعية كتير شككوا فيهم و أنا أظن مافضلش غيرهم كده مع تغيير المساعدين الخلفى عشان يتظبط اداء العربية (ان شاء الله بردو).
بالنسبة لموضوع السخونة أنا بعد ما غيرت الخرطوم البايظ و غطا القربة, رحت جبت علبتين مياه حمراء من الشهابى (55 ج العلبة) و اشتريت 4 زجاجت مياه مقطرة (2 ج العلبة) و الميكانيكى نزل المياه القديمة و استبدلهم ب دول, و فى اول كام يوم نقصت المياه بسيط و ح\يت ايدى على قلبى لكن الحمد لله حتى الأن (أنا غيرتها من أسبوعيت تقريبا) المياه و قفت عند مستوى ثابت فى منتصف القربة تماما و فوق مستوى ال Min بفرق مريح.
طيب بالنسبة لموضوع الجنوط انا لقيت جنوط 16 استيراد أصلى (مختوم جواها VW) البتنزل فى البورا برد و نوعها BBS و الراجل طلب 2500 من بقه (انا لسه مصلتش) و كمان أنا سألتو على الجنط ال 15 الأصلى الكانت بتنزل بيه هنا (أبو 5 ذراعات ده) قلى ممكن يجيبهولى على 1500, بس طبعا كده فرق الفلوس عالى ده غير فرق الفلوس الهيحصل فى فرد الكاوتش (عاوز رأيكم يا جماعة أنا خايف ال 1 ميدينيش الثبات المتخيلو و فى نفس الوقت أنا خايف ال 16 يدبدب).
طيب بالنسبة للكاوتش أنا رحت قعدت مع م/ نجاد من بريدجستون(مش مقتنع انى أجيب حاجة غيرو) ال فى أخر عباس العقاد (بنزينة كالتكس), و قعدت أدردش معاه شوية ووصلنا لمجموعة من الخيارات المتاحة:
1- 195/65 15 (و ده الحجم الأصلى طبعا) و الفردة بتتكلم من 450 أندونيسى تقريبا حتى 535
(يابانى soft super silent)
2- 205/60 15 و الفردة ممكن تزيد و توصل ل 600 ج(بس هتزود الفرق البين الجنط و الرفرف ب 4 ملى)
3- 205/55 16 و هنا اختيارات فردة تماثل ال ب "535" فى الاختيار الأول هيوصلنى ب 700 ج للفردة تقريبا (الموضوع على أوى)
انا بصراحة بردو محتار و لسه مخدتش قرار, و ليه واحد حبيبى صاحب محل جنوط و كاوتشات و راجل ثقة, قلى توكل على الله فى 16 لأنو هيفرق معاك فى الشكل جامد و هيحاول يدورلى على جنط أصلى يكون أقل من 2500 ج و كمان قلى ممكن أجيبلك الكاوتش بسعر الجملة لأنو أكيد يباخد خصم خاص.
(طبعل هريت ودنكو كالعادة بالرغى) لاكن فكروا كده و قلوقلى رأيكم فى 3 مواضيع (المساعدين الخلفى - الجنوط - الكاوتشات), و أسف فى التقصير فى الدخول عشان أنا كنت ساعتها بدخول ب موديم صديق و اضطريت أدهولو بعد كده, و كل ده كنت مستنى النيت يدخل فى بيتى الجديد (بيت الزوجية) و لسه داخل يوم الخميس الحمد لله.
أخوكم
أحمد عبد الرحمن
|