استشارات من خبراء اللانوس...
السلام عليكم ورحمة الله وبركاته
السادة ملاك و خبراء الدايو لانوس..كل سنة وانتم طيبين و في خير حال انتم و اهلكم و من تحبون.
انا بحكم العادة من زمان لما احب اشتري حاجة اسال الناس و ادور بنفسي لحد لما اقتنع او اصرف نظر.ومن ساعه ما بعت عربيتي القديمة و انا قولت اقيم اللانوس.وبدات اقرا كل مشاركات الاعضاء وعندي كم سؤال لحضراتكم..
1- رأيكم في اللانوس (خصوصا لانوس 1) بكل حيادية.ما لها و ما عليها من كل الجوانب..ميكانيكا و عفشة و كهرباء و صاج و اسعار قطع الغيار و استهلاك بنزين و معدله و التكييف و الباور و كل حاجة.
2- بالنسبة للانوس الاتوماتيك..هل الفتيس بتاعها فيه مشاكل زي النوبيرا كده ولا ابن حلال و كويس و يعتمد عليه..
3- هل فيه فرق جوهري بين لانوس1 ولانوس 2 غير الشبكة الامامية و الفوانيس الخلفية..فرق مثلا في ابعاد العربية او العفشة او الموتور ولا هم الاثنين زي بعض..
4- هل في مشكلة مزمنة في طرمبة الميه بتاعة لانوس 1 ولا كلام فاضي مالوش اساس و هل بردو فيها مشكلة سخونة مزمنة ولا بردو كلام فاضي..
5- هل لانوس1 فيها فيشة الاوكتان زي لانوس 2 ولو في.مكانها فين.وهل تعديلها بنفس الكلام اللي في لانوس 2.
6- سؤال فني بقى..بالنسبة لو انا ظبطت فيشة الاوكتان على مثلا بنزين 90 و حطيت 92 .هل ده يبقى احسن في سحب العربية ولا ايه و بنفس الطريقة لو ظبطها على 80 و حطيت 90 بردو يبقى احسن في السحب ولا ايه.
7-هل لانوس1 في منها مواصفات خليجي ولا كوري و بس..وبالنسبة للانوس2 .ايه افضل موديلات نزلت منها..هل 2001 و 2002 ولا لحد كام..وبالنسبة للاسعار عاملة كام للانوس1 و لانوس2 موديل 2002 مثلا و تكون رايقة كده..
8- انضف واكتر ناس امينة و خبرة و تشخيص حاله العربية فين بس يكون جنب 6 اكتوبر او الجيزة فين..وده لاني لما ان شاء الله ربنا يوفقني لعربية كويسة محتاج اعرف تاريخ حياتها كله بمعنى الكلمة و اعرف حالتها.باختصار افليها و افحص كل مسمار فيها..لان حضراتكم عارفين الواحد بيتعب اد ايه لحد ما بيجيب القرش و مش ناقصة ان الواحد يلبس في عربية مش كويسة.
اخيرا انا بجد باشكركم جدا على اللي انت بتعملوا مع الناس و مساعدتكم ليهم و ربنا يوفقنا جميعا و يصلح حال المسلمين عامة و بلدنا خاصه.
السلام عليكم ورحمة الله وبركاته
|