[الأصولي]

السلام عليكم يا شباب
بصراحة أنا اشتريت عربية سينا 2003 ، 1400 cc من حوالي شهر كانت حالتها فوق الممتازة وصاحبها كان عارضها للبيع 38 ألف جنيه وقال فيها عيب الاسكترا بتسرب زيت وفعلا كل أسبوع كنت بزودها بغطاء زيت أو اتنين كمية بسيطة جدا ، حالة الموتور كشفت عليه على الكمبيوتر المهندس قالي ممتازة التكييف شغال جنوط اسبور وكاوتش تيوبلس كله جديد وفرش جلد جديد كدا تمام، المهم خدتها على 35 ألف عشان الاسكترا (المزايا اللي انا شوفتها فيها 1: مش بتسخن خلبص يعني المؤشر بيفضل عند الشرطة الأولي أقل من الربع.
2ـ جميلة جدا في السحب
3ـ الثبات بالنسبة ليه ممتاز يعني أقصى سرعة جبتها عليها 130 كيلو على طريق مصر اسكندرية الزراعي ودا كويس لي عشان لسه متعلم بعد ما جبتها يعني من شهر
4ـ الشكل جميل
5ـ البنزين 90 ماشي 80 ماشي وأخر مرة مشيت بيها مسافة 160 كيلو تقريبا ب10 لتر بنزين 80 يعنى فوق الممتاز على حد علمى عن طريق النت
* أما قريت عنها كتير قبل ما اشتريها وشوفت 3 عربيات قبلها الأسعار من 30 ألف إلى 40 ألف موديل 2001الى ، يعنس السعر عندك كدا فيه حاجة غامضة وما تقلش االتاجر صاحبي عسان صاحبه قرشه ومصلحته أولا .
المهم أكمل عن عربيتي الشنطة كبيرة جدااااا مشوفتش قدها
الكنبة اللى ورا بتاخد ثلاثة أجسام عادية المساعدين ورا والسست كانت ضعيفة غيرتها بقت تمام
من أسبوع عملت حادسة بيها كنت ماشي في الظلام طريق زوجي رايح جاي كنت بقلب نور عشان مااضيقش اللى جاي فجأة لقيت عربية كارو حديد قدامي هربت منها ورديت تاني في طريقى بس للأسف دراع الاسطترا اللى ماسك العجلة متحملش وانكسر ولفت العربية ومشيت بالجنب مسافة في التراب وبعدين قبل ما أنزل في ترعة كانت جنب الطريق صدنى بفضل الله حوض اللى ماكينة الري بتحط فيه الميه سند العربية من الجنب ووقفت وكنا 4 ركبينها محدش اتخدش بفضل الله بس العربية طبعا الاسكترا بعد الدراع ما اتكسر اتعوجت والمساعدين باظت الللا قدام ومقص أمامي كمان باظ وخبطة بسية أوى من الحوض بتاع ماكينة الري في الصاج مش محتاجة غير سمكرة بسيطة ودهان
العفشجي غيرلي المساعدين والمقص واسكترا من عنده استعمال بس لقيتها بحط الزيت ينزل خلال ساعة بالكتير ويفضي زيت الاسكترا قلتلع دى بايظة قال هات طقم أولسيه من اسكندرية وأنا أحاسب عليه كان حسب الاسكترا 600 من غير تركيب قلت الطقم بيضرب بعد فاطره ما أنا عارف كل حاجة عن الاسكترا قبل كدا لأنها كانت معيوبة وكنت عايز أغيرها بس لما ربنا يفرجها المهم رجعت اسكندرية ( الحادسة والعفشجي كان في المنوفية بلد أهلي )
قلت أشوف في الفراهدة أو صلاح الدين في اسكندرية حاجة استيراد بيشكروا فيه وبيقولو أحسن من الجديد اقيت التجار مفترييت اللى يقول 1500 جنيه واللي يقول 1200 ، والجديد في التوكيل 3500 جنيه وفيه مهندس في ونجت عنده الايطالي ب 2000 جنيه جديده المهم روحت للشيخ طارق بتاع المنتدي اللي معانا في المنتدي في محله في الهرم بجد راجل محترم ومش انتهازي جيبتها استيراد ب400 جنيه بس وعلى التجربة ولسه الميكانيكي هنا في اسكندرية كان بيركبها انبارح وبعدين هاحكم عليها لما اجربها واقولكم على اللي حصل. وعلى الرغم من التعب اللي شوفته بعد الحادسة لسه بحبها وهاصرف عليه باذن الله لحد ما ترجع زي الأول عشان هي مالهاش ذنب.
المهم::::::::::::::::::
السينا اللي بيركبها لو حالتها كويسة أيا كان موديلها يبقى بيفهم وهوه لو قال غير كدا يبقى العيب في العربيه أو فيه (مش عايز يصرف عليها عند حد بيفهم) وعموما حتى لو بي ام أو مرسيدس أو أي نوع مستعمل لازم يصرف.

أخيرا اسف على الاطالة ولوحد عنده استفسار أو مساعدة أو تقييم لكلامي بخصوص السعر أو المزايا أو العيوب يتفضل يشاركني ولو على الخاص وله جزيل الشكر
أخوكم / إبراهيم الشربيني 22/ 10/ 2012