رد: بالله عليكم الدخول ومساعدتى فى سيينا 1400 cc
سعر قطع الغيار مش رخيص و أعلي طبعا من لانوس و الفيرنا و الحاجات ديه. قطع الغيار معمرة و ما افتكرش اني غيرت حاجة مرتين.
قطع الغيار كلها موجودة جديدة عند محمد يوسف في فيصل و الدقي. يا ريت أي حاجة في الموتور أو الكهربا تعملها في التوكيل عشان ما حدش يعك و لو هي حالتها نضيفة زي ما قولتلك مش هتروح التوكيل غير في الصيانات الدورية.
العربية ما شاء جميلة و عملية و موفرة في البنزين. عمرها ما سخنت مني غير مرة واحدة لما كنت بشغل التكييف و كان السبب أن السرعة التانية للمروحة ما اشتغلتش لما التكييف اشتغل. التكييف كويس جدا علي فكرة.
العيب الوحيد العفشة طرية جدا و بتهبط لو ركب ورا اتنين فممكن تشوف عفشجي محترم يعملك أي اختراع ينشفها شوية.
المهم لما تجيب سيينا تجيب حاجة نضيفة و ما فيهاش غلطة و لا الهوا عشان مشكلتها أن أصحابها بيبهدلوها لأن قطع الغيار مش رخيصة زيي ما قولتلك.
العربية ديه أنا بعتها عاملة 170000 كم و صاحبها ما فتحش الموتور لحد دلوقتي و زمانها معدية 200000 كم. كانت 2002 و 1400.
|