بسم الله الرحمن الرحيم
ابسط اختبار لمعرفة وجود احمال علي السيارة و هي غير دائرة كالتالي
1 - هتخلع كابل من البطارية
2 - هتجيب لمبة صغيرة حوالي 5 وات او 10 وات زي المستخدمة في النور الصغير او نور الصالون
3 - هتركب فيها سلكبن في الاطراف
4 - هتوصل طرف بالبطارية و الطرف التاني بالكابل اللي خلعناه
5 - لو اللمبة نورت دة معناه ان فيه سحب و العربية مش شغاله بس استني شوية لو عربيتك حديثه هتنتظر ثواني لغاية مانور الصالون يطفي و ده من غير ماتلغي اللي عملناه علشان العربيات الحديثه نور الصالون بيبقي علي تايمر و بيعمل سحب ثواني و بيفصل بعدها
طيب فرضا اللمبة فضلت بعد دقيقة او دقيقتين برضه منورة انا قصدي متوهجه مش مسرية يبقي فيه حاجه كمان بتسحب و عموما اول حاجه هتشيك عليها نور الشنطه لو الشنطه فيها لمبة ممكن تكون مش بتفصل ( مش قلت لك ماتسيبش باب التلاجه مفتوح - زيها كده بالظبط ) هتتأكد ان لمبة الشنطه بتفصل لما بتقفل الشنطه ماتسألنيش ازاي حط واحد جوة الشنطه و اقفل عليه
تاني حاجه لمبة درج التابلوه دي برضه ممكن تكون عامله سحب
ثالث حاجه ام بي ثري الولاعه لو الولاعه شغالة مباشر و مش علي الكونتاكت
رابع حاجه جهاز الانذار اه فيه اجهزة انزار غبية حملها عالي
خامس حاجه وحدات رفع الزجاج و مكن الزجاج ممكن يكون فيه زجاج اي باب رافع للآخر و الزرار او وحدة الرفع بتعلق عايزة الزجاج يطلع من سقف العربية
عادي بتحصل و مش هتاخد بالك بس دي هتعرفها لو حطيت ايدك علي الفرش ناحية ماكينة الزجاج هتحس بسخونتها
سادس حاجه سلك الذاكرة بتاع الكاسيت - ايوة اي كاسيت بيبقي فيه سلك اصفر بيوصل مباشر علشان المحطات المخزنة و آخر وضعيه كان مفتوح او مغلق و اعدادات السماعات و الفوليوم و الوقت ممكن يكون ذاكرة الكاسيت بتستهلك شوية
لو لقيت كل ده سليم و اللمبة برضه متوهجه يبقي حلال عليا عربيتك و كفاية عليك فيها 100 جنيه علشان انا زهقت
لو اللمبة فيها يعني شبه تسرية بس فده طبيعي و ساعتها يبقي البطارية بايظه
و اي خدمة
م / سامح ليله