هو ده الكلام التمام و هى دى الناس المحترمة بجد ptmnlo123per171
يلا ...ميدو و سعداوى يبوسوا بعض بوسة جامدة
انا ححكيلكو على الى اعرفوا عن الانسر و عن الياريس
انا رحت اتفرجت على الياريس و عجبتنى جدا , عالية عن الارض و واسعة من جوة و قالولى ان فيها عفشة الكورولا و كمان نفس الموتور بتاعها ( 1300 ) و ده كان كفاية جدا عليا عشان اشتريها كان كل اعتراضى عليها .....
1- العدادات الى فى نص العربية ... كانت جيبالى تخلف عقلى
... قلت مش مشكلة , ابقى اعمل سور بينى و بين الى قاعد جنبى ... عشان انا مش بحب اى حد تانى يبص على العدادات و انا سايق ... عشان عيب كدة
2- اختى الصغيرة لما شافتها قالتلى هو مين الى داس على مناخير العربية دى ؟؟؟!!! قصدها ان بوز العربية ملموم حبتين ..
3- قابلت بالصدفة واحد كام معاه ياريس و قالى بعد لمل اشتراها بـ 3 اشهر , ظهر له عيب فى الكومبيوتر بتاع العربية و لمل راح التوكيل لقى فيه 5 عربيات تانية فيها نفس العيب , اصلاح العيب ده حيكلفه 8000 جنيه( العربية خليجى يعنى ملهاش ضمان ) !!!!
الراجل راح بايع العربية .... و من يوميها و لما بتمشى جنبه عربية ياريس بيقعد يعيط و يقول انا عاوز ماما
انا قلت مش مشكلة اكيد الراجل ده ملهوش فى الكومبيوتر او هو الى لعب فيه
4- السبب الرئيسى ... الياريس كانت اغلى من الانسر بـ 5000 جنيه
قلت مش مشكلة .. اتكل على الله و اجيب الانسر
انا مليش فى العربيات كتير زى الاستاذ سعداوى او الاستاذ ميدو بس انا سقت الياريس و الانسر و ممكن اقول لكم اهم الفروق الى انا شايفها :-
1- سحب الياريس يا عينى عليه .... سحبها كويس جدا ما شاء الله , سحب الانسر ( 1300 )كويس برضو و عاجبنى جدا .. بس الياريس احسن
2- المساحة الداخلية .. تقريبا الاتنين نفس الوسع من جوة . بس الياريس مفيهاش القنطرة الوسطى الى فى الكنبة الخلفية , و ده الى مخليها اسهل فى الحركة للجالسين على الكنبة الخلفية .....مساحة كنبة الانسر كويسة جدا
3- كراسى الانسر حجمها اكبر و مريحة اكتر شوية من الياريس
4- الياريس عليها شنطة ما تعدمهاش كبيرة على عكس ما تبدو من الخارج .... الانسر شنطتها عريضة و ممكن تقول نفس الحجم تقريبا
5- حوض الموتور كبير فى الانسر , الكبوت فى الياريس صغير بس لما تفتح الموتور تلاقى الحوض كبير
6- تكييف الياريس ( التويوتا ) احسن من تكييف الانسر ( الميتسوبيشى )
7- صوت موتور اللانسر اوطى من صوت موتور الياريس ( العزل فى الاتنين كويس جدا )
8- الياريس فيها ABS , الانسر مفيهاش ( 1300 ) بس فراملها كويسة جدا
9- سعر الانسر كان اقل عام 2008 , انا جبت عربيتى بـ 89 الف , الياريس كانت بـ 94 الف ( جميع الكماليات مانيوال )
الى مش عاجبنى فى الانسر ....
1- قطع الغيار سعرها غالى شوية ... انا بعمل الصيانة فى التوكيل ... اه التوكيل نفسو مش عاجبنى
2- صاجها خفيف خالص , انا عارف ان كل الجدييد كده , بس بردو مش عاجبنى ( الله يرحم ايام ال 132 ) يا سيـــــــــــــــــــــدى على الصاح و الحديد و الصلب الى كان فى البودى , بس كان بينقطع نفس اهلى و انا بزقها , يلا , اهو كنت بربى عضلات برضو
الى عاجبنى فيها :-
1- التسارع بتاعها كويس جدا , محدش يقولى الجولف احسن ولا الجيتا مش عارف ابصر ايه , انا مجربتش العربيات دى , انا كنت سايق ال 132 و بعديها الشاهين
2- عفشتها كويسة و ناعمة
3- استهلاك بنزينها اكتر من رائع
4- مفيهاش تكنولوجيا معقدة اوى و حساسات كتير و الا كان زمانها وقفت منى من بدرى
ربنا يخليهالى , انا مطلع عينيها , انا عامل بيها 82 الف كم و هى موديل 2008
انا طولت عليكو , بس بجد انا بحترم الياريس و الانسر جدا و بحترم حضراتكوا جدا جدا