[ahmed el gendy]

الحادثه دي حصلت عند مدخل مدينه الزقازيق يعني اي حد من بنها او كايرو جيه الزقازيق من عند طريق منيا القمح اكيد هيكون شافها

التوقيت الساعه 9 باليل عربيه هيونداي النترا سوداء كامله اوتوماتيك فاتحه سقف جنوط اسبور ماشيه ف طريقها عادي جداااااااااا خارج من الزقازيق رايح منيا القمح وعربيه شيفروليه دبابه موديلات بدايه الالفينات اللي عرف الطريق ده فيه سور ف النص يعني اللي داخل الزقازيق مالهوش دعوه خالص باللي خارج من الزقازيق ولكن بتاع الشيفروليه الدبابه بيعدي من اليو تيرن ما شافش الالنترا السوداء وخبطوا ف بعض من سرعه الالنترا الدبابه ركبت علي سقف الالنترا طبعا الالنترا كل سنه وانت طيب نص امامي وسقف من غير تفكير وفوق ده كله مكان التقاء قوايم السقف من ورا بالشنطه او الرفرف الخلفي للعربيه من ناحيه اليمين الصاج فيها متني بشكل مبالغ فيه يعني زي ورقه وتنيتها كده ما اعرفش هتحتاج نص ورا كمان ولا ايه ده بالنسبه للهيونداي اما الدبابه محتاجه باب يمين وفوانيس ورفرف وشويه حاجات هايفه بس فيها حاجتين هم المشكله القايم اللي ورا الباب اليمين داخل لجوه مع الباب مش عارف دي هتتعدل ولا هيغير الكابينه كلها الاهم بقي ودي الكارثه انا باقول لكم الدبابه اتشالت ع الهيونداي الشاسيه بتاع الدبابه متني من تحت فيه تقويسه زي نص كوره صغيره كده والصندوق الخلفي بتاع الدبابه فاكك من مكانه

اللي يزعل بقي ان سواق الهيونداي ظابط ف الجيش وكان معاه مراته و ولاده الراجل اخد الخبطه كلها تقريبا لانه واضح انه حاول يفادي الدبابه بس ما لحقش فالخبطه كلها كانت ناحيته الراجل انقل المستشفي والناس كانوا بيقولوا شبه سليم شويه كسور بسيطه و مراته والاولاد كانوا سلام مفيش اي حاجه فيه ولد من الولدين قعد جنب العربيه عشان ما تتحركش من مكانها علي ما المرور يثبت الحاله عشان حقهم

اللي زعلني اوووووي حاجتين الاولي الولد وانا باكلمه قالي العربيه موديل 2011 وترخيص فبراير 2012 ما عملتش صيانه العشر الاف كيلو لا حول ولا قوه الا بالله لفيت حول العربيه وهي مخبوطه السقف والشنطه والكبوت لسه عليهم اللزق الابيض بتاعها العربيه من الجنبين ومن ورا مفيش فيها خربووووش والله العظيم بجد زعلت جدا جداا ما هو مال مسلمين برده

الحاجه التانيه اللي زعلتني جدااا وتزعل اي حد طبعااا امبارح كنت باصلح حاجه ف عربيتي ف بلد جنب منيا القمح الصنايعي قعد يقولي انت مش لسه راشش العربيه من 3 شهور ايه الحكات دي كلها قلت له ياعم ف داهيه الحكات دي كلها المهم ربنا يستر طريقنا ويبعدنا عن البلاوي الكبيره قالي والله عندك حق انت ماشفتش الحادثه اللي كانت علي اول الزقازيق من اسبوعين قلت له عارفها مش بتاعت الهيونداي الدبابه قالي اه ما هو صاحب العربيه الهيونداي من هنا قلت له ايه اخباره قالي الراجل اتنقل المستشفي عادي وهناك اكتشفوا انه عندك 5 فقرات ف الرقبه اتفرتكوا غير كسر ف ضلوع نقلوه مستشفي الجيش بعد ما اهلوا صرفوا يجي 10 الاف اشعه عليه وقعد يومين ف مستشفي الجيش و ربنا افتكره هناك وقعد يقولي دا العربيه ما مشيتش حاجه والله دي ما كملتش 3 شهور الراجل كان معاه لادا نيفا قبلها ولسه شاري دي

عيني ساعتها دمعت وقلت لاحول الله يا رب يعني الراجل بايع عربيته القديمه ورايح يشتري عربيه جديده عشان العربيه ماتمشيش شهرين ويموت فيها لا اله الا الله

ربنا يرحمه يا رب ويرحم جميع اموات المسلمين والمسلمات