[AAAH]

المشاركة الأصلية كتبت بواسطة ahmed_eng2001 عذرا .... حضرتك ستجد ثقافة الكورى موجودة فى كل مكان فى العالم .... مش فى مصر فقط ... بس احنا عندنا زيادة شوية ... انا سمعت كتير عن جودة و اداء الستروين و الرينو ... بس لم يسعدنى الحظ بالتعرف عن قرب على هاتين الماركتين بس فيه مشكلة صغيرة ... ممكن تأرق حياتك و تتعبك جدا ... و هى قطع الغيار توافر قطع الغيار من عدمه .. ممكن يوقفلك عربيتك و متعرفش تحركها تانى ياريت حضرتك تسأل كويس على قطع الغيار علشان تكون على دراية كويسة قبل ما تشترى عجبنى جدا رأى الاستاذ وائل ابو السعود ( كارز ادماير ) عن قطع الغيار و ازاى كان زمان بيعدل و بيصنع قطع الغيار فى عربياته غير المنتشرة استخير ربنا و اتكل على الله ... و ربنا يوفقك

ربنا يبارك فى حضرتك يارب
وطبعا كلام حضرتك صحيح 100% بخصوص موضوع قطع الغيار
بس برضه كلام الناس مش مضمون انا اول عربيه فكرت اجيبها كانت ستروين ax والناس كرهتنى فيها برضه بسبب قطع الغيار والصنايعيه والكلام ده كله وللأسف مشيت ورا كلامهم وبدأت الرحله الصعبه بتاعه كل المصريين على مدار سنوات عديده بداية من ال 127 مرورا بال 132 ... الخ وبصراحه العربيات دى كلها علمتنى الادب وكرهتنى فى العربيات كلها وبعد اخر عربيه ليا (كانت فيات 127) قررت انى اضرب بكلام الناس عرض الحائط واشترى ستروين ax ونزلت سألت على قطع غيارها بنفسى ووالله لقيت قطع غيارها مرطرطه وفرنساوى اصلى وفى اكتر من محل عندهم قطع غيارها من الاكسدام للاكسدام ومعظم محلات الاستيراد فيها صنايعيه بيشتغلوا فى العربيه دى وحافظينها فحمدت ربنا على اختياره لى وكان اختيار ممتاز والعربيه ما شاء الله عليها ربنا يحفظها عمرها مازعلتنى فى حاجه خلال الفتره اللى قعدت معايا فيها الى الان ولا يعيبها الا صغر حجمها الشديد وعدم وجود تكييف وكان ممكن اجيب غيرها بعد سنه لما الفلوس اتوفرت معايا بس انا ماكنتش متضايق منها فى حاجه واللى خلانى افكر اغير دلوقتى مشوار مرسى مطروح اللى روحته اول الشهر لانى فعلا مكنتش لاقى مكان فى العربيه احط فى الشنط والحاجات بتاعتنا خصوصا ان انا عندى 3 اطفال وموضوع التكييف ده برضه كان تانى عامل خلانى اخدت القرار ده
فإن شاء الله انزل اسأل على قطع غيار العربيتين بالتفصيل واستخير واللى فيه الخير ربنا يقدمه ان شاء الله
معلش انا اسف انى طولت كده وصدعتك