العضو pro mada ومكالمة مباحث امن الدولة
يوم الاتنين الساعة تقريبا 9:15 بالليل و برو مادا او خلينا نقول اسمه الحقيقى م/ احمد راقد على السرير مريح شوية عشان وراه مشوار فجأة لقى الموبايل بيرن
احمد بصوت واطى نعسان : الو......... مين
الطرف التانى بصوت صارم حبتين : المهندس احمد الشهير بـ برو مادا
احمد ولسه صوته نعسان : ايوة انا احمد .......... استاذ نبيل اللى معايا ؟؟
الطرف التانى والصوت بقى اشد صرامة : لا مش الاستاذ نبيل .......... معاك العقيد صلاح من مباحث امن الدولة
فجأة وبلا مقدمات احمد فط من السرير وشعر راسه وقف وشفايفه ابيضت وريقه نشف وبصوت مبحوح : ايوة يافندم ......... خير فيه حاجة؟؟!!!!
العقيد صلاح وصوته بقى اشد صرامة : لا مش خير .......... احنا عايزينك تشرفنا شوية
ابو حميد ركبه سابت ومفاصله بقت بتخبط فى بعض ومش عارف ينطق كلمتين على بعض
العقيد صلاح بصوت بارد : انت ماسمعتنيش والا ايه؟؟!!!
احمد بارتباك : لا سمعت ياباشا ......... بس هو انا عملت ايه ؟؟؟!!!!!
العقيد صلاح : مش انت عضو برضه فى منتدى اسمه مصر موتورز ؟؟؟
احمد وارتباكه زاد : ايوة ياباشا بس انا ماعملتش مشاكل مع حد
العقيد صلاح : مش انت برضه اللى كاتب موضوع ما الاسباب من وجهة نظركم
احمد ومش عارف يبلع ريقه : ايوة ياباشا بس انا مش قصدى حاجة
العقيد صلاح : طب فيه واحد رد على موضوعك ........ واحنا كتا عايزينك تشرفنا شوية عشان نتناقش فى اللى اتكتب
احمد وخلاص دمه هرب : اشرفكم فين ؟؟؟؟ فى امن الدولة ؟؟؟؟ وبعدين ياباشا انا لسه ماشوفتش الردود وماليش دعوة باللى هو كتبه
العقيد صلاح : طب خلاص ماتخافش ........... انا صلاح عبد النبى اللى رديت عليك فى الموضوع
صمت رهيب وصوت ضربات قلب ابو حميد بقت واصلة من بورسعيد لحد عندى والضحك مسكنى ومابقتش عارف ارد عليه من كتر منا متخيل شكله من الخضة والمفاجأة
احمد : الاستاذ صلاح ؟؟؟!!!! .......... ياراجل دا انا دمى نشف حرام عليك والله ده انا مش عارف اتلم على بعضى
طبعا القصة دى حصلت فعلا بينى وبين ابو حميد وكان اتصالى اصلا بيه عشان اسأله على حاجة فى الكومبيوتر لكن مش عارف ليه الفكرة دى جت فى دماغى وعملت المقلب ده معاه وبعد ما فاق وراق ودمه رجع تانى وريقه جرى وضربات قلبه هديت وعرف ياخد نفسه
اتكلمنا حوالى ساعة الا ربع فى حاجات كتير وعرض عليا مقابلة فى بورسعيد مع جميع الاعضاء اللى يقدرو يروحو لسه هايظبط ميعادها بالظبط مع وعد منه ان لو اتعملت مقابلة فى القاهرة هايكون اول واحد موجود فيها عشان يتعرف بكل الاعضاء
واتفقنا فى الاخر نعملها قصة نحطها فى الاستراحة عشان يعرف ردود جميع الاعضاء على المقلب اللى حصل فيه والخضة اللى كان فيها
وفى الاخر نسيت الموضوع اللى انا اصلا متصل بيه عشانه ptmnlo123per1106
ودى حكاية برومادا مع مكالمة مباحث امن الدولة 
__________________
عجبي علي العجب العجيب العجاب
لما الحقيقة تطل بعد احتجاب
و تروح و تحلا وفجأة تصبح مفيش
كمثل طراطيش بحر ياما خد و جاب
عجبى !!( صلاح جاهين )
التعديل الأخير تم بواسطة salahabdelnabi ; 09-11-2009 الساعة 11:43 PM
|