السلام عليكم ورحمه الله وبركاته
معايا عربيه ماتريكس 2006 اوتوماتيك
اتعلمت السواقه فى مكتب على عربيه 128 بس طبعا كان تعليم شبه كروته ومش كامل
المهم جيت اسوق عربيتى حسيت بصراحه ان المانيوال اسهل بكتير من الاوتوماتيك مش عارف ليه لانى بحس انى بسيطر على العربيه افضل من الاوتوماتيك
المهم وانا ماشى فى الشوارع بخاف اخبط الناس من ناحيه اليمين من العربيه لانى مش بحط فى بالى انى قريب جدا منهم لدرجه قبل كده كنت سايق بسرعه وواحد قدامى على بعد 50 متر والله كنت هشيله لولا ستر ربنا وهو حس ام طالع على الرصيف وانا كل ده فاكر انى هبقى بعيد عنه خالص
ويا سلام بقى لما ابقى داخل حاره ديقه من حوارى المنطقه عندنا ( الخليفه ) يا سلام بقى بيبقى كل همى ان العربيه ما تتحكش وما تتخدش وبحس انى داخل حرب والتكاتك بقى مش عاوز احكيلكم بنزل من العربيه بمسك فى زماره الى سايقها بسبب الكلاكسات الى بتخلينى اشد فى شعر دماغى ويا حبذا بقى لما بنزل على صلاح سالم الى عباره عن 4 حارات وتلاقى كل شويه واحد يدينى اشاره انه عايز يخرج منى والتانى الى ورايه عاوز يعدينى ويسبق شغلانه بصراحه مقرفه يا ريت يا جماعه حد يقولى موضوع تقدير المسافات ده احسبه ازاى وخصوصا لما تبقى عربيه ماشيه جمبى مش سايبانى فى حالى ( رخامه )
