[AbOnOrA]

تخيل يا باشمهندس انك بتدور على عربيه فوصيت البواب يشوفلك حد عايز يبيع عربيتة ويبلغك وبعدها بقى البواب كل ما يشوف عربيه فى الحته عليها للبيع او بواب زميلة يقوله على عربيه يجي يقولك
هى الانترنت زى كدة بالظبط بتنقلك اعلان وحقيقة ان العربيه للبيع مش اكتر
وكل الاحتمالات بعد كدة وارده منها انها تكون عربيه بيتى او صاحبها يكون تاجر او صاحبها يكون بيتى بس جايبها من تاجر واتغش فيها وعايز يصرفها او يكون بيتى بس مبدهل العربيه او او او
كل الاحتمالات واردة فى سوق المستعمل سواء كان اعلان على الانترنت او فى جرنان او نزلت سوق الجمعة

المهم يكون عندك استعداد لاختبار العربيه واللى بيبيعها كمان وتتاكد بنفسك من حقيقتها

وكتجربة شخصية انا بقالى اكتر من 4 - 5 سنين دلوقتى بشترى عربيات وببيع عربياتى من على النت واشتريت عربيات بمئات الالف من على النت عادى جداً المهم اكشف عليها كويس اساسيات وورق وكل حاجة

والخلاصة اللى بيعرف يشترى مستعمل ممكن يشتريها وهى طايرة .. فى الفضاء حتى مش بس على النت

بس المهم تكون بتعرف تشترى مستعمل وحط تحتها مليون خط