[eslamafify]

السلام عليكم

اخر الاخبار بقى :

رجعنا الموتور والفتيس عشان عدم توافر عصايه الفتيس او قطع غياره (نادر جدا )
الفتيس الى موجود وحاجته موجودة بتاع البونتو وده cvt بردو بس كهربا وبكنترول غير الاولانى الى رجعناه
حاولنا نشغله على نفس المكنة بس كان لازم نرجع كنترولها والهاف انجكشن بتاعها
وقابلتنا مشاكل فى الموضوع ده لان التاجر كان مجمعلنا الفتيس من مكنه تانية الى هى فل انجكشن
وكل كونترول من حته والضفيرة دى لو حدها ودى متقطعة وعايزة تتجمع وطقم الدوارة لوحده بيتكلمو فيه ب 4000 والا تلغى اموبلايزر وتعديلات بالهبل عالضفيرة بتاعت الفتيس و بتاعت الموتور وعالبى سى الى بيجمعهم
والمبلغ زاد لان فتيس البونتو اغلى بيعدى ال 3000 و 3500

قلت بلاش العك ده منا اجيب المكنة الفل انجكشن بفتيسها واريح نفسى

سمعت من 6500 لحد 7500

فانا قررت اكنسل بقى كل العك ده كله لانه هيبقى بهدلة ومصاريف عالفاضى وكل شوية هنقف على حاجة ونجرى نجيبها وتعطلنا ايام وهتخلى الموضوع بايخ اوى

وبعد كده قررت اشترى نص كامل بصاجه بتبلوه بكله ويكون اتوماتيك ورجعت الحاجة القديمة واتفقت مع التاجر الى هيجيبلى النص انى هستلمه داير بمفتاحه قدامى
وتم الحمد لله اشتريت نص بونتو اوتوماتيك وكمان معاه الدنجل الخلفى بالطنابير عشان حساسات الabs ومعاه ضفيرة العربية كاملة

والموتور 1200 فل انجكشن 80 hp
بمبلغ 10000
النص ب9500 والدنجل الخلفى ب 500
وامبارح بس بدانا نشتغل فيه وفكينا الجنبين ونزلنا المكنة بفتيسها برا
انا بشتغل باليل فى جراج وبالتالى الكاميرا الى معايا صورها مش اد كده
هتصرف فى كاميرا محترمة وابقى ارفع الصور

وعايز اشكر المهندس رامى صفوت جدا جدا جدا جدا على تعبه معايا فى كل الخطوات دى مع التاجر
كان الراجل هيورط نفسه فى كل التعديلات دى لحد ما ربنا هدانى لفكرة النص دى عشان تريحنا وتريحه

طبعا النص كامل بكل حاجة يعنى كل الى هنعمله اننا هنفك من هنا ونركب هنا بدل منلف حوالين نفسنا فى تعديلات احنا فى غنا عنها

انا كنت عايز اعمل الموضوع ده بموتور كربراتير عادى خالص من غير دوخت الانجكشن والكونترولات والكلام ده

بس حجم الحوض والاختيارات الى كانت قدامنا كانت محدودة
ومكنة البونتو وفتيسها كانو انسب الاختيارات