رد: انجازات السيسى وعدلى منصور
السلام عليكم ورحمة الله وبركاته
انا شخصيا من وجهة نظرى لا أجد حتى الآن اى انجازات ايجابية لعهد عدلى منصور والسيسى والوضع لا يفرق عن زمن الاخوان ومساوئهم وزمن مبارك والحكم العسكرى لمصر الذى استمر على مدى 60 عام
الفقير لا حول ولا قوة الا بالله هو المظلوم فى كل المراحل السابقة
الاسعار تزداد سوءا
حديد التسليح زاد سعره
مصر اللى كانت مصدرة للاسمنت اصبح السعر العالمى منافس لنا واصبحنا مستوردين له
المستشفيات عام وخاص فى منتهى السوء
الخضار والفاكهة نار
الانبوبة اصبحت عملة صعبة
اللحوم زاد سعرها اول اكتوبر
مصاريف المدارس الخاصة عادى جدا زادت زيادة غريبة
الامن واضح للجميع السرقات والخطف والمخدرات الوضع من سئ للأسوء
يعنى بصراحة الكام شهر اللى فاتوا عصر عدلى منصور والسيسى = عصر الاخوان اللى كان ما يعلم به الا الله = عصر مبارك وما قبله
يعنى لنا الله
الملحوظة الواضحة جدا واللى فى زيادة ساحقة هى
غياب الاخلاق وازدياد الانقسامات السياسية والمهاترات
الكل بقى بيفهم سياسة ومناقشات فى كل مكان وشتائم وتجاوزات ومهاترات
الشباب اصبح فى منتهى البجاحة وقلة الزوق وغابت القيم والمبادئ والتربية
الشعب المصرى فلت زمامه وكأن كان الحل الوحيد له هو حبيب العادلى وديكتاتورية مبارك وسلفه
لا حول ولا قوة الا بالله
فريق يشتم فريق ويقول يا عبيد البيادة وده طبعا لا يصح وقلة حيلة فى الاقناع والمناقشة
والفريق الآخر يشتم ويقول يا خرفان
وانقسمنا اكتر واكتر وكأن اهم هدف من ثورة يناير هو ( قسم الشعب على قد ما تقدر وانفخ النار بين الاقسام وفرقهم وطلع لهم تريقة ونكت يرموا بعض ويتريقوا على بعض )
غابت العقول وحضر الشياطين لإحداث الفتنة والخلافات بأكبر قدر ممكن
هل سيظهر رئيس مدنى ينقذ مصر وشعبها ويجمعهم كلهم على حب مصر واهلها وترابها ونبنى كلنا بلدنا بدون تحامل على أحد ونكون كلنا ايد واحده نبنى
ولا نبكى على اللبن المسكوب
هل مناصرى الاخوان هيبطلوا الحلم برجوع الرئيس الناجح جدا مرسى اللى ولع البلد وزهقنا من الشرعية المزعومة اللى تسببت فى القتل والتدمير ده كله
هل المدافعين عن السيسى وخلافه هيفوقوا بقه ويعرفوا ان السيسى ليس البطل اللى هنقعد نمجد له ونغنى له زى مبارك ومن قبله وان الموضوع مش موضوع شخص ولكن الكارثة ان بلد بأكملها بتضيع ونبحث عن الديمقراطية العادلة الضائعة فى تمجيد وتفخيم أشخاص ونشوف انجازات ملموسة 
ولكن للأسف لسة السكينة سارقانا كلنا وهنشوف دلوقتى فى الموضوع ده وغيره
كم الشتائم والهجوم و المشاحنات بين الاطراف وبعضها ولا حياة لمن تنادى
والله والله ده ربنا سبحانه وتعالى صابر علينا قوى
وكل آيات القرآن الكريم يظهر لنا جمالها وبلاغتها على مر العصور والازمان
لا املك الا انى أدعو لنا جميعا كل أعضاء منتدانا المحترم ولك الشعب المصرى وكل العرب ربنا يسترها
اللهم إحفظ بلدى الحبيبة مصر وأهلها جميعا من الانقسامات والاختلافات
اللهم ارزق مصر بالرئيس الذى يجمع اهلها على حبها وبناءها يارب وليس خرابها
اللهم ارنا الحق حقا وارزقنا اتباعه وارنا الباطل باطلا وارزقنا اجتنابه
إخوانى الكرام
كونوا عباد الله إخوانا
__________________
اللهم ياجامع الناس ليوم لا ريب فيه اجمع على ضآلتى
سبحان الله وبحمده سبحان الله العظيم
|