رد: التحايل "الاخوانى"!!
زمان كان فيه قصه بتتحكي لنا عن الطمع، عن الولد اللي دخل إيده جوه برطمان الحلوى، وكبش كبشه كبيره، بعدين ماعرفش يطلعها لأنها إتحشرت في البرطمان.
الولد بدأ يعيط، ويحاول يخرج إيده، ومافيش فايده..لغاية في الآخر ما بتيجي أمه وتقول له إنه لازم يسيب شويه من قطع الحلوى اللي في إيده، عشان يعرف يطلع إيده من البرطمان.
القصه ممكن تكون طفوليه شويه، بس معبره جداً..لو حاولت تاخد كل حاجه، مره واحده..يبقى غالباً مش هتاخد حاجه في الآخر خالص.
غالباً الإخوان كلهم كانوا غايبين يوم درس القراءه ده في المدرسه..بس النظريه ممكن تطبها عليهم بالحرف
طمع في البرلمان كله (مشاركه لا مغالبه) فإتحل البرلمان..قرر يحط الدستور لوحده، إتوقف الدستور..حاول يسيطر على كل مناصب البلد من أول الرئيس للوزير...فلا بقى عنده رئيس، ولا وزير، وهيرجعوا تاني جماعه محظوره.
في أي لحظه، كان قدامهم فيها ياخدوا جزء من المكاسب، أو المكاسب كلها..طمعوا في المكاسب كلها.
حتى وهم بينازعوا في الآخر، السيسي قال لهم مهله إسبوع..ومهله تلات أيام..وماطلعش قدم تنازل واحد ينقذ بيه نفسه، إذا ماكانش من باب (المشاركه لا المغالبه) فمن باب الذكاء على الأقل...لكن أبداً.
فراح مرسي، وإتقبض على القيادات، وإتفض الإعتصام بالقوة، والناس ماتت بلا ذنب، بسبب طمع أو غباء قياداتها.
وده مش تبرير للقتل خالص..ده تسلسل الأحداث (ومازال فض الإعتصام بهذه الوحشيه جريمه لا يبررها الغباء أو الطمع أو الخوف، ولا قلة حيلة الشرطه، ولا لاميس الحديدي)
بس يبقى السؤال..هم الإخوان ليه لسه إيدهم جوه البرطمان؟
يعني بعد أن أثبت الطمع إنه أسرع وسيله للخساره والسقوط.. إسأل الإخوان في مظاهرتهم هم عايزين إيه؟
عايزين كل حاجه..
الناس تخرج من السجن، والدستور بتاعهم يرجع، ومرسي يرجع رئيس، والسيسي يتحاكم.
إتنازل عن إيه؟
ولا حاجه
يعني وأنت في الحكم، مارضيتش تتنازل..فخسرت كل حاجه...ليه متخيل إن طلباتك - اللي هي أصلاً مبالغ فيها - هتجاب كامله، وأنت مافيش في إيدك أي حاجه؟
محتاج تخسر إيه تاني عشان تعقل، وتطلب حاجه منطقيه، تعرف تمسكها وتطلع إيدك بيها من البرطمان؟
__________________
وأتت ملائكة النعيم كما روت* روحي بطون أكفها خضراء* صعدت بروحك والعبير يحفها* والنور ترسم دربه الأنواء*
شرقت حشاشات النحيب وأينعت*
وشوى الأنين قلوبنا فتفطرت*خلف الجفون دموعنا الخرساء*
أكبادنا فبكاؤنا إيماء*
|