سلام عليكم
هو موضوع غريب من اوله بس بصراحة بعد ما طلعت عينى المطبات لما اتعقدت نفسيا خلاص طقت فى دماغى اطور نظام جديد لكل العربيات المانيوال بدون ما اعدل اى حاجه فى الميكانيكا بتاعتها - حاجه كده نظام ركاب و امشى-
عشان كده قررت اصمم نظام طيار الى للعربيات يتكون من 4 اجزاء
الجزء الأول علبة التحكم الميكانيكى فى عصاية الغيارات و دية ببساطة هنشيل عصاية الفتيس القديمة و نركب العلبة دية على علبة عصاية الفتيس بدون ما نعدل اى حاجه داخلية فيه
الجزء الثانى مجموعة التحكم فى دواسة البنزين و دية بتركب عبارة عن محرك خطوى و بكره و شداد و سينسور يقيس الدواسة اتحركت قد ايه بالظبط
الجزء الثالث مجموعة التحكم فى دواسة الدبيراج و دية برضو عبارة عن محرك خطوى و نفس المجموعة السابقة بالاضافة الى سينسور بيركب على دواسة الفرامل
كل ده بدون اى تعديل للدواسات او الميكانيكا
الجزء الرابع الكمبيوتر و دايرة التحكم و مستشعرات للمسافة بين العربية و العربية اللى وراها و اللى قدامها بدون ما نعدل فى اى حاجه فى كهربة العربية او الكمبيوتر بتاعها
المجموعة دية بتشتغل ازاى بقى
فى بداية تشغيل العربية بتختار وضع rise up من شاشة الكمبيوتر و يبداء الكمبيوتر يطبق يحدد المسافة بين العريبة و المحيط اللى حولية و يشغل العصاية ما بين الاول و المارشدير لحد اما تخرج العربية من الباركنج
بعدها يبداء المستخدم فى اختيار احد برامج التشغيل التالية من شاشة الكمبيوتر
speed up و ده بيخلى العربية تدوس بنزين و تاخد غيارات و دبرياج لحد اما تقفل سرعتها
speed down و ده بيخلى العربية تبداء تخفض سرعتها لحد اما توصل لسرعة الغيار الثانى
sleep و ده بيخلى العربية تستخدم المستشعرات و تنزل على المور
park و ده بيخلى العربية تحسب المسافات و تعمل باركنج
road bump و ده بيخلى العربية تتهيئ لدخول المطب و بعدها بتعمل ريليز اوتوماتك عشان ترجع للبرنامج اللى انت ظابطها عليها
target speed و ده بتختار فيه سرعة معينة توصل ليها العربية لوحدها و تثبت على السرعة دية
road balance و ده بيحسب سرعتك و المسافات بينك و بين العربيات اللى حوليك و يبداء يعلى او يخفض السرعة حسب الحاجة
t mode و ده بيخلى العربية تاخد غيارات قليلة عشان تتعامل مع المطالع الطرق الصعبة
sport master و ده بيخلى العربية تعمل النقلات على ار بى ام معين يضمن تحقيق اعلى سرعة و فى نفس يسمح للعربية تحقق اعلى توازن مع ضغطة الفرامل يبداء الكمبيوتر يختار التصرف المناسب اذا كان مور او يفصل التروس او ينزل غيارات
طبعا مع الفرامل السيستم بيفصل و يعيد تقييم الموقف و يكمل برنامجه عادى
ده شكل الفلوشارت
و ده العلبة اللى هتركب مكان عصاية الفتيس و اعلاها الكمبيوتر و الشاشة و الزراير
و ده شكل الدواسات ولاحظ انها ما اتلغتش خالص
الموضوع لسه قيد التصميم عشان كده اللى عنده اقتراحات بنائة سواء فى خيارت برمجية اضافية او حساسات وادوات مساعدة يهمنى اسمع وجة نظره
يهمنى كمان اعرف رد فعل كل واحد لو النظام ده طرح بشكل تجارى فى السوق ؟
تحياتى و رمضان كريم