[zing0]

فيه إعلان عن المنفاخ الواحد بستم (أنا شايف إنه مقنع جداً للعربيات الملاكى), و فيه صورة ليه.
فعلاً بينفخ الكاوتش من الأرض فى دقيقه و يمكن أقل, يعنى ممكن على ما تسخن العربية يكون نفخ الكاوتش, و الموقف ده حصل معايا بالفعل.

الحمد لله ربنا أعانى و نزلت جبت الواحد بستم بـ 145 جنية من محل (مش من إللى فارشين فى الشارع), و طبعاً صينى (كله صينى, ده بقى فى بنى آدمين صينى فى مصر كمان). و طبعاً الضامن هو الله, و معاك ضمان إستبدال لحد باب المحل فقط.

المهم كنت نازل الشغل الصبح و كعادة زوبه و مفاجأتها الرخمة ألاقى الكاوتش نايم عالأرض, خرم عالصبح كده
طبعاً كالعادة نازل متأخر, رحت فاتح الشنطة و مطلع المنفاخ و قولت أجرب, لو فيه نتيجه ماشى, مفيش ألحق أشوف أى مواصله.
كنت عامله سلكين بمشبك كروكودايل (مشبك تمساح من عند بتوع قطع غيار الإلكترونيات) و ركبتهم فى قطاشات البطاريه, و سميت الله و دورت العربية (علشان أسخن عادى), و رحت مركب الخرطوم فى الكاوتش, و بسم الله , و شغلت.
الله أكبر, بجد أداء لم أكن أتوقعه, فى أقل من دقيقه كان الكاوتش على 35
و بالنسبة للمؤشر بتاعه,مش بيختلف أوى عن الديجيتال.
لأنى رحت لبتاع كاوتش عنده مؤشر ديجيتال و لاقاه على 36.

دلوقتى هسيب رابط الإعلان بتاعه و ليه فيديوهات عاليوتيوب لنفس الشركه
بس ده طبعاً للإيضاح مش للإعلان, و كفايه أنك تعرف ثمنه فى الشركه (الوااااااد بستم بـ 250 ج و مبيرضوش يقولوا غير لما تتصل + مصاريف الشحن 20 جنيه)
فى التوفيقيه بـ 145 أو حتى 150 (السعر الشائع بدون فصال) - طبعاً فرق سعر شاسع.
الشركه مسمياه هرقل (براحتهم حتى لو هيسموه عنترة بن شداد_ صنع فى قبيلة عبس), فى التوفيقية ما لوش أسم غير 1 بستم.
http://dvd4arab.maktoob.com/f499/3488867.html