[AbOnOrA]

فتاوى تكفيير الفكر المخالف عموماً والليبرالية والاشتراكية نموذجاً

طبعاً انت انكرت الاول موضوع التكفيير والتفسيق والشتائم وقولت فين الدليل ولما جبتلك فتوى روحت قايل اه وجايب فتوى تؤيد نفس الكلام وبغض النظر عن التناقض الواضح فى كلامك ومواقفك بس انا مش بحاسبك ولا هى خناقة زى ما بتقول لكن انا عايز امشى معاك واحدة واحدة يمكن نفهم بعض

بص انا عايز افهمك حاجة الاول وهاخد مثال من الفتوى اللى انت نقلتها والمثال ينطبق على الكل

السؤال بتاع الفتوى بيقول ايه


السؤال: هل يجوز إطلاق لفظ علماني أو لبرالي على من يتفاخر بهذه التسمية ويقول: أنه علماني وليبرالي، ويعارض علناً تطبيق الشريعة.

اللى متعلم بالاحمر ده هو عين المكر والخبث او الجهل على اقل تقدير

ليه بقى انت شايف انه بيعارض تطبيق الشريعة وعلنا كمان يبقى اسأل الشيخ عن موقفة عن المعارض لتطبيق الشريعة مال الليبرالية والاشتراكية بالموضوع !!!

فى الفتوى بتاعة الشيخ الفوزان الراجل بيسأل عن حكم اللى بيؤمن بالحرية المطلقة بدون ضوابط شرعية ما معروف ومش محتاجة فتاوى انه يبقى منكر للدين واصولة مش محتاجة ذكاء يعنى بس مال ده بالليبرالية واو الاشتراكية وغيرهم من الافكار (الاجتماعية والسياسية) مش الدينية اصلاً !!!

اى حد بيفهم عامة ممكن يعرف اجابة اى فتوى من دول من نص السؤال لان الاسئله كلها بيبقى فيها اى مصيبة تخرج من الملة او تطعن فى الدين ويلزقها بالفكر اللى عايز يشوهه او ياخد فتوى من الشيخ ضدة يقول الشيخ قايل الفتوى على الفكرة المضادة للدين اساساً مش على الفكرة الاجتماعية او السياسية

ابسطهالك اكتر كمان ؟
زى عندنا فى مجال السيارات فيه فتاوى كتير بخصوص التقسيط الاسلامى وحصل ان شيوخ قالت فتاوى بتحريم نظام تقسيط وهى هى نفس الشيوخ رجعت قالت انه حلال اشمعنى ؟
نفس الحكاية ارجع للسؤال اللى اتطرح على الشيخ وانا طبعاً باخد على بعض المشايخ انهم يردو على الاسئلة بالعموميات وبدون تفصيل وتأصيل كافى لتمييز الضوابط الاساسية ودلالتها الشرعية لاحكامهم وفتاويهم

ابسط كمان ؟
زى ما اقولك ايه رايك فى اللى بيمسك بيشترى سكينة علشان يقتل الناس ويخوفهم
هتقولى ايه الراجل ده صح لاء طبعاً هتقولى غلط ومجرم
لكن هل ده معناه ان استخدام السكينة او شرائها بالعموم غلط واجرام ؟ اكيد لاء
اى حاجة فى الدنيا بيحكم عليها من استخدمها وغايتها ونتائجها

(تعرف الشجرة من ثمارها)

الخلاصة فى الموضوع ده ايه

اولاً لا انكر ان فيه ناس (مش كتير) فعلاً ضد الدين والشريعة ومن خوفهم على نفسهم وخبثهم يدعو انتماء فكرى معين اياً كان علمانية ليبرالية اشتراكية شيوعية اياً كان فقط علشان ميتقالش عليهم انهم ضد الدين والشرع فى حين ان كل فعلهم وافكارهم وقناعتهم ضد الدين والشرع وابعد ما تكون عن الفكر المستنير او الوسطية او العلم

ودول ميختلفوش خالص عن اللى بيتاجرو بالدين برضو وافعالهم وافكارهم كلها ضد الدين والرحمة واللى هى رسالة الله عز وجل للبشرية

وللاسف النموذجين من التطرف هما السبب فى تمزيق الامم والاوطان وانصاف المثقفين بيتوهو بين ده وده ده بيكره دول علشان دول وده مبيطيقش دول علشان دول والتعميم شغال على ودنة

ومن اجمل الكلام اللى اتقال فى الموضوع ده

الإسلام مش عبد المنعم الشحات . . . . والمسيحية مش نجيب ساويرس . . . . . والحريه مش علياء المهدى . . . . والجيش مش المجلس العسكري . . . ومبارك مش عيان . . . . وانت مش انت وانت جعان