[AbOnOrA]

اشكركم جميعا marid - المهندس علاء autotuck - المهندس فادى - احمد ودانتست على المعلومات القيمة والحوار العملى المفيد بس كنت اتمنى ميبهاش فيه هجوم شخصى خالص

لو تفتكرو من فترة كان مجموعة شباب عملو تصميم لبودى سيارة مصرية تماماً واصحاب المشروع دخلو المنتدى واتكلمو معانا
بصراحة ان واحد من الناس مش مقتنع باللى عملوه كفائدة اقتصادية للبلد او حتى لنفسهم ونصحتهم بانهم يدورو على طريقة يقدمو بيها حلول تجارية مفيدة زى انهم يصممو بدى كيت او فوانيس اضائة او هياكل سيارات النقل والاتوبيس بالتعاون مع الشركات المصرية المتخصصة فى نفس المجال علشان يبقى فيه محصلة مفيدة فعلا للناس

لكن مع اعتراضى على اللى عاملينة بس لازم نشجعهم لان دايماً البداية بتكون لان السعى للتطوير فى حد ذاتة وخاصة لو منتج محلى اكيد شىء يحترم

مين فينا وخاصة الاخوة المهندسين مكانش ليه اسكتشات وتصميمات واختراعات نفسة يعملها وان كان مع الوقت بتلاقيها ممكن تكون افكار ساذجة بس التجربة فى حد ذاتها افادة
انا والله وانا فى اعدادى كنت عامل تصميم لعجلة بدينامو وكنت عامل صاروخ باجنحة هيدروليك تفتح بعد فترة فيبقى مكوك وكنت عايز انفذه فعلا واركب فيه واحد صاحبى
ده غير تصميمات عملية لمازنجر وافروديت بس بصراحة انا عملت مازنجر بس افروديت ملقيتلهاش حل

فالقصد ان زى ما وارد ان صاحب التقنية يكون قصدة تجارى بحت وبيروج لتقنية مش ناحجة فعلاً علشان يحقق كسب سريع فوارد برضو ان يكون صاحب الفكره حد بيسعى لتطوير حل تقنى جديد ولازم نفكر معاه ونشجعة

ومن ناحية تانية برضو لازم اللى بيقدم فكره او حل تقنى جديد يكون عندة تقبل لاعتراضات الناس وارائهم حتى ولو كانت رافضة تماما او مشككة لان الرفض مبنى على قناعة علمية مش حاجة شخصية لا سمح الله

وده يخلى فى حوار علمى مفيد بين اصحاب التخصص ويوسع مدارك اللى خارج التخصص ويضيف معلومة عامة مفيدة
وده الحاصل فعلاً من حواركم واتمنى يستمر بالشكل ده ان شاء

نيجى بقى للموضوع نفسة
انا شايف ان فى رائ ثابت يتلخص فى عدم جدوى الحلول المعتمدة على الماء او حتى الهيدروجين بصورتة النقية خاصة بالشكل التجارى

وفى نفس الوقت فى راى يستحق الاحترام باهمية تطوير حلول بديلة ومساعدة للحد من استهلاك مصادر الطاقة الطبيعية الغير متجددة والاخذه فى النفاذ

ولا اعتقد ان حد بيقول ان الوسائل ديه ممكن تكون بديل كامل عن الوقود خاصة فى مجال السيارات بس لو الوسائل ديه قدرت تقلل الاستهلاك بشكل نظيف بيئياً يبقى اهلا وسهلا ليه لاء

وبعدين العلم ملوش نهاية يا جماعة وديه قاعدة اساسية تنسخ اى قاعدة اخرى (مش بقول تلغيها)
اتفق معاكم تماماً فى ان المياة فى حد ذاتها ليست وقوداً وان فرق وفاقد الطاقة كبير بس بدام قولنا كبير وصغير والموضوع فيه مقاييس فاكيد يبقى قابل للتغير باختلاف التقنيات
ومش لازم نحسبها بما هو متاح دلوقتى وبس فثورة العلوم الذرية بقالها كام مية سنة ولا ثورة الاتصالات بقالها كام سنة وثوره تكنولوجيا المعلومات بقالها كام سنة
هو مين كان متخيل ان اكتشاف البشر لابعاد الذرة يخلى الكترون مقذوف من شوية TNT يفجرو طاقة بحجم القنبلة الذرية
واذا كان الوقود الحفرى يحتوى على طاقة حرارية اكبر حتى من الهيدروجين ماحنا لسه برضو مش عارفين نستغل كل الطاقة ديه

فعلشان كده انا شايف الباب مفتوح على مصراعية لكل المجالات ديه
سواء بحوث تطوير وسائل مساعدة (لااقول بديلة) للوقود العادى (hybrid ) من الزيت من السكر من المية من العرقسوس مش مهم بدام نقدر نطلع طاقة ولو بسيطة نقلل بيها اعتمادنا الكلى على الطاقة الكهربية واحتراق الوقود الملوث يبقى شىء رائع

وايضا بحوث تقليل استهلاك الوقود العادى (وفعلا فيه تطور كبير فى المجال ده حالياً بفضل نفس الدافع)

انا اتصور واتخيل واتمنى ان العالم بعد 50 سنة بالكتير هيكون استهلاكة للطاقة متنوع من مصادر كتير
الشمس
- الرياح (كيا وابيزا قدمو حلول (تجارية) فعلا لاستخدام الرياح لتوليد الطاقة
- المواد العضوية الرخيصة بل وبالاخص المخلفات العضوية وفيه قرى كاملة بتشتغل بمولدات تعمل بالمخلفات العضوية
- الطاقة الميكانيكة المتولدة من الحركة والفرملة (زى ما الساعات الحديثة بقت تولد طاقة من حركة اليد وفيه تطبيقات فى مجال السيارات لاعادة استخدام طاقة الفرملة مثلا)
- الطاقة الحرارية (فيه حرارة مهولة بتنتج عن عملية الاحتراق وبتروح هباء مش بس كده ده احنا بنضيع طاقة كمان فى اننا نقلل ونمتص الحرارة ديه بشكل منظومات تبريد

واكيد فيه تطبيقات تانية غير ديه بس ديه الاشهر واكيد مش لازم تطبيق واحد يمشى العربية لوحدة ممكن تمشى بالوقود + حل من الحلول ديه وممكن باكثر من حل وممكن بكل التطبيقات ديه مع بعض ليه لاء
تخيل كده لو فيه عربية فيها تقنيات لاستغلال طاقة الرياح والهواء المقابل للعربية لتحويلة لطاقة كهربية + تقنية لاستغلال حرارة المحرك لتدوير توربين بخارى صغير ومطور يولد طاقة كهربية برضو + خلاياً شمسية تغذى البطارية الكهربية ايضاَ + مع استغلال طاقة الفرملة ايضا
كل دول ميقدروش يدونا طاقة كافية لعربية اقتصادية ؟
ده حتى لو هنحتاج نزود شحن كهرباء عادى وهنعتبر الوسائل ديه مساعدة يبقى نجحنا برضو
وممكن عربية تكون فيها كل الوسائل ديه لادارة محرك كهربى + محرك يعمل بالهيدورجين او الغاز الطبيعى او المثانول او ميت حاجة مساعدة غير البترول

واخيراً انصح صاحب الموضوع بانة ميتسرعش فى طرح المشروع بشكل تجارى بحت وخاصة فى مجال السيارات وخاصة وبالاخص باستخدام اساليب الدعاية التقليدية المبالغ فيها والتى تنفر اكثر من كونها ترغب
مفيهاش حاجة لما نقول المنتج ده بيوفر 10% او من 10 الى 20 برضو ممكن يكون له جدوى اقتصادية
ومش شرط التطبيق لازم يكون فى مجال العربيات
ممكن تطور التقنية للاستخدام فى الات صناعية او فى افران او استخدامات منزلية كل مكان محتاج لطاقة

علشان كده اذا كان الموضوع لمناقشة الفكرة وبحث علمى جاد يبقى اكيد ليه منا كل التقدير والاحترام لكن لو كحل تجارى اكيد التجربة بس هى اللى هتحدد موقف الناس من المنتج لان حتى لو الفكرة نجحت والمنتج بقى ليه فاعلية نسبية لازم كمان يثبت اعتمادية وامان وتوافق ومعايير جودة
انت بتتكلم فى جهاز هيتحط فى عربية بمئات الالف اكيد مش هجرب اختراعات حديثة فى عربيتى واكيد مش هكون احسن معامل الاختبار والعربيات الاختبارية اللى كل يوم شركة عمالة تعملها ايشى بالكهرباء وايشى بالهيدوجين وايشى بالذرة وايشى بالموز ptmnlo123per1116

اتمنى انى اكون قدرت اوصلكم وجهه نظرى فى الموضوع وان دعوتى لنبذ الخلاف الشخصى تلقى قبول جميع الاطراف وتعذرونى على الاطاله لانى طول النهار عمال اكتب فى الرد ده والله