[bmkbmk]

شكرا للاستاذ ابوهيما على فكرة الموضوع الهايلة و شكرا للاستاذ حورس على الرد و النقاش
و اللى استخلصته من كلامكم انتو الاتنين ان انتوا ما شاء الله ناس محترمة و فاهمة و عاوزين الفايدة للناس
و اللى بلاحظه انا ان فعلا معظم المصريين املهم فى الحياه وظيفة مريحة و بمرتب كويس و انا كنت من ضمن الناس دول
و الحمد لله بعد فترة طويلة من التعب و الطحن ربنا انعم عليا بالوظيفة المريحة و المرتب الكويس بس شوفوا المفاجأة بقى
انا طبعا كنت مبسوط فى الاول بس بعد فترة قليلة جدا بدأت احس انى مليش لازمة فى الحياة و ثقتى فى نفسى بدأت تتداعى و بدأت احس انى زى اى حد و يمكن اى حد كمان احسن منى (ده طبعا بالنسبة للكفاءة فى العمل ) و انا والله العظيم مش مغرور ابدا لا سامح الله بس اكيد يا جماعة كل واحد فينا محتاج يحس انه واثق من نفسه و خصوصا فى شغله
لأنى بصراحة شايف ان شغل الانسان هو من اهم الاولويات فى حياته لأن ببساطة الشغل هو اللى بيعمل الانسان
شغلك فى اعدادى هو اللى بيدخلك ثانوى و شغلك فى ثانوى هو اللى بيحدد لك كليتك و شغلك فى كليتك و اجتهادك هو اللى بيحدد لك حياتك العملية بعد كدة و شغلك بقى فى حياتك العملية هو اللى بيعملك كبنى آدم و يخليلك قيمة فى الدنيا مش لازم القيمة دى تبقى فلوس .. ممكن تبقى نجاح ممكن تبقى تقدير من الناس ... المهم فى الموضوع انك تشتغل و تخلص و تبذل مجهود و تفكر و تطور نفسك و تستخدم دماغك و ماتسيبوش يصدى و ربنا والله العظيم ماهيضيع تعبك
و يا سلام بقى لو شغلك ده معاه توكل حقيقى على الله .. هتبقى فعلا من الفائزين
المهم انا الحمد لله بدأت اتحرك و اذاكر حاجات جديدة علشان اقدر احصل على شهادات مهنية تعلى مستوايا و تتيحلى فرص احسن فى المستقبل
بس انا برده مش راضى عن نفسى و بجد نفسى اعمل حاجة تحسسنى بثقتى فى نفسى تانى .. ربنا يسهل ادينا بنجاهد
و مش عارف ليه احنا كمصريين مافيناش طبع المغامرة و لا المجازفة .. عاوزين وظيفة و خلاص ليه مابنفكرش فى مشاريع خاصة و حاجات تجارية و نتعب فيها و نكبرها و تكون حاجة نافعة للناس ..
يعنى لو انا معايا قرشين ,, هل المفروض اروح افتح كافيه ولا قهوة ؟ مع كامل احترامى لاصحاب المشاريع دى بس انا كدة ابقى افدت الناس فى ايه ؟؟؟ قدمت ايه جديد ...
انا عاوز اعمل مشروع يفيد الناس بجد ..و اكون شغال فيه و بتعب و باجتهد .... و اخد عليه اجر فى الدنيا و الاخرة
طيب كل اللى اتقال ده حلو قوى بس احنا دلوقتى عاوزين افكار للمشاريع ....
انا ممكن اقول لكم افكار بس صدقونى مش هتستفيدو منها لأن الافكار دى انا جايبها من ظروفى انا و تفكيرى انا و اللى ممكن انا اعمله
و نصحيتى لكل واحد عاوز فكرة مشروع يدور فى دماغه و فى شغله و فى الشارع اللى ساكن فيه و من خلال احتياجات الناس من جيرانه و اصحابه و قرايبه فى شغلهم او فى حياتهم اليومية و من خلال امكانياته المادية و الجسدية و النفسية ... اكيد هيلاقى مشاكل موجودة عند الناس هو يقدر يحلها عن طريق انه يعمل مشروع صغير يبدا بيه و مع الشغل و الاجتهاد المشروع هيكبر و هينجح

. و اكيد هيوصل على الاقل لتلات او اربع افكار كمان ممكن تبقى مشاريع ناجحة ... و يركز بقى كل شغله و جهدة فى فكرة واحدة بس و تكون اكتر فكرة جديدة مش موجود منها كتير او حتى اللى موجود منها مش بنفس تميزها و بعدين يعمل لها دراسة مستفيضة و يعرف كل مخابئها و بعدين يتوكل على الله و يبدأ فيها .. و اكيد هتقابله مشاكل كان عامل حسابها و مشاكل ماكنش عامل حسابها بس مفيش مشكلة فى الدنيا ملهاش حل مادمنا عايشين و بنتنفس و لازم هينجح بإذن الله

و ربنا يكرم الجميع